Rusia goditi Kievin me raketën e re hipersonike, liderët e Perëndimit reagojnë të tronditur

Rusia përdori sot një raketë të re balistike hipersonike në një nga bombardimet e saj më të mëdha të rajonit të Kievit që nga fillimi i luftës, me sulmin që la të paktën katër persona të vdekur.

Shtetet e Bashkuara e klasifikojnë Oreshnikun e përdorur gjatë sulmit, si një raketë me rreze të mesme veprimi, e cila mund të mbajë shumë koka luftarake konvencionale ose bërthamore. Shpejtësia dhe trajektorja e saj e bëjnë atë pothuajse të pandalshme nga sistemet e mbrojtjes ajrore në dispozicion të Ukrainës dhe e sotmja ishte vetëm hera e tretë që Rusia e ka përdorur raketën.

Presidenti ukrainas Volodymyr Zelensky tha se raketa kishte rënë pranë qytetit Bila Tserkva në Ukrainën qendrore. “Ata janë vërtet të çmendur. Është jetike që kjo të mos mbetet e pandëshkuar për Rusinë", tha ai.

Edhe liderët europianë reaguan të shqetësuar për armën e përdorur nga Moska.

“Mund të thuhet se Moska përdor raketa balistike me rreze të mesme veprimi Oreshnik – sisteme të projektuara për të mbajtur koka bërthamore. Është një taktikë politike frikësuese dhe një veprim i pamatur bërthamor në prag të sulmeve”, tha shefja e punëve të jashtme të Bashkimit Evropian, Kaja Kallas, në një postim në X.

Sakaq, Presidenti francez Emmanuel Macron dënoi sulmin e Rusisë gjatë natës, duke thënë se përdorimi i Oreshnikut nënkupton një përshkallëzim të agresionit rus.

Foto: AP/Efrem Lukatsky

Kancelari gjerman Friedrich Merz në krahun tjetër tha se përdorimi i Oreshnikut nga Rusia ishte një “përshkallëzim i pamatur” dhe përsëriti premtimin e Gjermanisë për të “qëndruar fort në anën e Ukrainës”.

Gjithsej, Rusia lëshoi 600 dronë dhe 90 raketa gjatë natës, sipas Forcave Ajrore të Ukrainës, të cilat thanë se mbrojtja ajrore rrëzoi 604 prej tyre.

Ndërkohë, ministri i Jashtëm i Ukrainës, Andrii Sybiha, tha se raketa e lëshuar mbante një kokë luftarake artificiale. Sybiha e përshkroi atë si “një nga sulmet më të mëdha” ndaj kryeqytetit.

“Fatkeqësisht, jo të gjitha raketat balistike u rrëzuan. Kievi pësoi goditjet më të shumta dhe ishte objektivi kryesor i këtij sulmi rus”, tha ai.

Sulmi i natës në kryeqytet erdhi pasi Presidenti rus Vladimir Putin urdhëroi hakmarrje për një sulm vdekjeprurës ukrainas në një rajon të pushtuar nga Rusia. Putin akuzoi Ukrainën për një akt terrorist, duke pretenduar se dronët ukrainas goditën një konvikt kolegji në Starobilsk, një qytet i pushtuar nga Rusia në Luhanskun lindor të premten.

Agjencia shtetërore ruse e lajmeve TASS tha të shtunën se numri i “fëmijëve të vrarë në sulmin me dron ukrainas” ishte rritur në 18, duke cituar Ministrinë e Emergjencave të Rusisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)