Takaichi rikonfirmohet kryeministre, partia në pushtet triumfon në zgjedhje në Japoni

Partia në pushtet e Japonisë, e udhëhequr nga Sanae Takaichi ka fituar lehtësisht në zgjedhjet e parakohshme të së dielës. Pak para orës 17:00, transmetuesi kombëtar raportoi se Partia Liberale Demokratike, së bashku me aleatin e saj, Partinë Ishin, siguruan më shumë se dy të tretat e vendeve në Dhomën e Ulët, shifër që përkthehet në 328 nga 465 ulëse.

Kjo shumicë e shtuar i jep LDP-së mundësinë për të anashkaluar Dhomën e Lartë, ku partia nuk ka shumicën.

Kryeministrja e parë femër e vendit vendosi të shkojë në zgjedhje për të rinovuar mandatin e saj, vetëm katër muaj pasi mori drejtimin e LDP-së. Ajo madje ishte zotuar të jepte dorëheqjen nëse partia e saj nuk arrinte të siguronte shumicën, duke i bërë zgjedhjet e parakohshme një rrezik të madh.

Popullariteti i vetë Takaichi-t ka ofruar ndihmë të konsiderueshme, pasi vlerësimet e miratimit të qeverisë së saj janë ende mbi 70%.

Presidenti i SHBA-së, Donald Trump, e kishte mbështetur hapur Takaichi-n. Disa ditë më parë, ai shkroi në një postim se kryeministrja "duhet të njihet për punën që ajo dhe koalicioni i saj po bëjnë".

“Si president i Shteteve të Bashkuara të Amerikës, është nder për mua të shpreh mbështetjen time të plotë për Sanae Takaichi”, shtoi ai.

Ky është një sukses që bie ndesh me dy paraardhësit e saj, nën udhëheqjen e të cilëve, partia humbi shumicën parlamentare për shkak të skandaleve të korrupsionit dhe shpenzimeve në rritje.

Në vitin 2024, LDP humbi shumicën në të dy dhomat e Parlamentit dhe aleanca e saj dhjetëvjeçare me partinë Komeito u shemb. Komeito madje bashkoi forcat me Partinë Kushtetuese Demokratike të Japonisë për të formuar bllokun më të madh të opozitës në Dhomë. Në këtë kontekst, Takaichi dhe LDP u përballën me një opozitë më të bashkuar se në të kaluarën.

BBC kujton se koalicionet e udhëhequra nga LDP-ja e kanë qeverisur Japoninë për pjesën më të madhe të historisë së saj të pasluftës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)