Zjarri i mori jetë bangladeshasit në Durrës, Inspektoriati i Punës zbarkon në fabrikën e skafeve

Një ngjarje tragjike u regjistrua mëngjesin e sotëm në zonën e Fllakës, në Durrës, ku një shpërthim i dyshuar i një bombole gazi i mori jetën një 25-vjeçari nga Bangladeshi dhe la të lënduar një tjetër shtetas të huaj.

Ngjarja ndodhi rreth orës 08:00 në ambientet e një fabrike që merret me prodhimin e skafeve, në zonën e sektorit ‘Rinia’. Sipas informacioneve paraprake, zjarri ka rënë në një nga magazinat e subjektit, ku ndodhej edhe një ambient kuzhine i përdorur për akomodimin e punonjësve të huaj.

Dyshohet se shpërthimi i bombolës së gazit ka ndodhur në kohën kur punonjësit ishin në gjumë. Për pasojë, 25-vjeçari humbi jetën nga asfiksia, ndërsa një tjetër punëtor u transportua në spital për ndihmë mjekësore.

Foto: Newsmax Albania

Pamjet nga vendngjarja tregojnë se ambienti është shkrumbuar plotësisht nga flakët.

Pas ngjarjes, në fabrikë kanë mbërritur edhe inspektorët e Inspektoriatit të Punës, të cilët po kryejnë verifikime lidhur me kushtet e akomodimit dhe trajtimit të punonjësve të huaj. Burime bëjnë me dije se punonjësit e huaj ishin të pajisur me kontrata të rregullta pune dhe jetonin brenda ambienteve të subjektit.

Ndërkohë, grupi hetimor vijon punën për të zbardhur plotësisht shkaqet dhe rrethanat e zjarrit fatal.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)