“Nuk po gjuajnë për foka”, komandanti i NATO-s ngre alarmin për prezencën ruse dhe kineze në Arktik

Komandanti Suprem i Forcave Aleate të NATO-s për Evropën, Gjenerali Alexus Grynkewich, ka konfirmuar pretendimet e Presidentit amerikan Donald Trump se Kina dhe Rusia po zgjerojnë praninë e tyre në Arktik, duke e cilësuar prezencën e tyre si një përpjekje për të “përcaktuar se si mund t’i kundërvihen aftësive të NATO-s në det dhe nën sipërfaqen e tij”.

“Arktiku po bëhet gjithnjë e më shumë një skenë e konkurrencës midis fuqive të mëdha, gjë që mund të rrisë rreziqet për sigurinë kombëtare dhe stabilitetin global”, tha ai.

Deklaratat e fundit nga samiti i NATO-s theksojnë militarizimin në rritje të rajonit dhe bashkëpunimin e Rusisë dhe Kinës në kundërshtimin e interesave perëndimore, ndërsa Trump shpreh pa mëdyshje dëshirën e tij për të marrë Groenlandën, gjë që provokon kundërshtimin e Danimarkës, vetë Groenlandës dhe aleatëve evropianë, si dhe kritika publike nga ligjvënësit aktualë republikanë.

Grynkewich tha në një konferencë suedeze për sigurinë kombëtare se Rusia dhe Kina po shtojnë patrullimet e përbashkëta në Arktik, duke zgjeruar praninë e tyre nga bregu verior i Rusisë në zonat në veri të Alaskës dhe pranë Kanadasë.

"Kjo nuk është për qëllime paqësore", tha Grynkewich. "Ata nuk po studiojnë foka dhe arinj polarë. Ata po kryejnë studime batimetrike dhe po përpiqen të kuptojnë se si mund t'i kundërvihen aftësive të NATO-s në det dhe nën det. Kjo është diçka që mund të përshkallëzohet shumë shpejt dhe ne duhet të jemi të vetëdijshëm për këtë dhe të jemi të përgatitur për këtë", tha gjenerali i NATO-s.

Ky studim batimik, ose hartëzimi i shtratit të detit, ka zbatime ushtarake që nisin nga navigimi i nëndetëseve deri te planifikimi i itinerarit për infrastrukturën nënujore. Edhe pse anijet ruse dhe kineze po rrisin numrin e patrullave të përbashkëta në ujërat e Arktikut, Grynkewich nuk beson se një kërcënim i menjëhershëm për territorin e NATO-s është i mundshëm, pjesërisht për shkak të preokupimit ushtarak të Moskës me luftën në Ukrainë.

"Ne shohim një trend të ngjashëm në Arktik dhe në Veriun e Largët. Anijet ruse dhe kineze po kryejnë gjithnjë e më shumë patrullime të përbashkëta. Akullthyeset kineze dhe anijet kërkimore janë në ujërat e Arktikut dhe kërkimet e tyre nuk janë paqësore në natyrë. Synojnë të fitojnë një avantazh ushtarak", argumentoi ai.

Deklaratat e forta të Grynkewich vijnë teksa Donald Trump, këmbëngul se Groenlanda është “e mbipopulluar” nga anijet kineze dhe ruse, gjë që u mohua disa ditë më parë nga zyrtarë të lartë dhe udhëheqës të vendeve nordike, sipas të cilëve Presidenti i SHBA-ve e përdor këtë tezë si argument justifikus për pretendimin se SHBA-të duhet të marrin kontrollin e ishullit Arktik për arsye sigurie kombëtare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)