“Roja i Arktikut”, NATO nis misionin historik pas presionit të Trump mbi Groenlandën

NATO njoftoi të mërkurën nisjen e një misioni, të quajtur "Roja i Arktikut", për të forcuar praninë e saj në ujërat e akullta ndërkombëtare, një veprim që synon të qetësojë Presidentin e SHBA-ve Donald Trump pas tërheqjes së tij nga pretendimet territoriale mbi Groenlandën.

“Misioni i ri do të shfrytëzojë forcën e NATO-s për të mbrojtur territorin tonë dhe për të siguruar që Arktiku dhe Veriu i Epërm të mbeten të sigurta", tha në një deklaratë Gjenerali i SHBA-ve Alexus Grynkeëich, Komandanti Suprem i Forcave Aleate për Evropën.

Sipas aleancës, "Roja i Arktikut” nënvizon angazhimin për të mbrojtur anëtarët e saj dhe për të ruajtur stabilitetin në një nga zonat më të rëndësishme strategjike dhe sfiduese për mjedisin në botë.

Sipas NATO-s, misioni fillimisht do të mbikëqyrte operacionet e vazhdueshme nga anëtarët e aleancës në rajon, siç janë ushtrimet e ardhshme nga Norvegjia dhe Danimarka.

Nuk është ende e qartë nëse "Roja i Arktikut" do të përfshijë dërgimin e kapaciteteve shtesë ushtarake në rajon, por ajo çka dihet është se NATO ndodhet në krizë për shkak të debateve mbi Groenlandën.

Muajin e kaluar, Trump rinovoi përpjekjen e tij për të marrë kontrollin e ishullit Arktik, një territor gjysmë-autonom që është pjesë e mbretërisë daneze, duke përmendur kërcënimet e supozuara nga Rusia dhe Kina në këto vise të akullta.

Foto: NATO

Komentet e tij e zhytën aleancën transatlantike në krizën e saj më të thellë në vite, me disa aleatë që sugjeruan rritjen e pranisë së NATO-s në Groenlandë për të zbutur mosmarrëveshjen mbi territorin.

Pas një takimi në janar me Sekretarin e Përgjithshëm të NATO-s Mark Rutte, presidenti amerikan u tërhoq nga premtimi i tij dhe njoftoi se ishte hartuar një kornizë për një marrëveshje të ardhshme mbi Groenlandën dhe të gjithë rajonin e Arktikut.

Marrëveshja synon të sigurojë mbrojtjen në Arktik përmes veprimeve të përbashkëta nga shtatë aleatët: Shtetet e Bashkuara, Kanadaja, Danimarka, Norvegjia, Suedia, Finlanda dhe Islanda.

Zëdhënësi i Ministrisë së Mbrojtjes së Gjermanisë për Rojën Arktike, Mitko Müller, i tha DW se Gjermania do të përfshihej në aktivitetet e NATO-s në Arktik, megjithatë tha se detajet e përfshirjes do të jenë të disponueshme më vonë.

Sipas informacionit të marrë nga agjencia gjermane e lajmeve DPA, Forcat e Armatosura Gjermane, ose Bundeswehr, planifikojnë të marrin pjesë në “Roja i Arktikut” me avionë Eurofighter dhe transportues A400M.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)