Gjenerali iranian: Do të djegim çdo anije në ngushticën e Hormuzit

Një këshilltar i Gardës Revolucionare Islamike të Iranit ka paralajmëruar se çdo anije që kalon nëpër Ngushticën e Hormuzit do të jetë objektiv sulmi, duke rritur ndjeshëm tensionet në një nga rrugët më të rëndësishme detare të botës.

Gjenerali Ebrahim Jabbari, këshilltar i komandantit të Gardës Revolucionare, deklaroi për transmetuesin shtetëror iranian IRIB se ngushtica është “e mbyllur” dhe se forcat detare të IRGC-së dhe ushtria do t’i “vënë flakën” çdo anijeje që përpiqet të kalojë.

“Ne nuk do të lejojmë që nafta të eksportohet nga ky rajon derisa ata të ndiejnë presionin”, tha ai, duke paralajmëruar vendet që të mos afrohen në zonë.

Ngushtica e Hormuzit është një korridor i ngushtë detar në jug të Iranit, përmes të cilit kalon një pjesë e madhe e eksporteve globale të naftës nga vende si Arabia Saudite dhe Kuvajti drejt tregjeve ndërkombëtare. Çdo bllokim i kësaj rruge ka ndikim të drejtpërdrejtë në çmimet e energjisë dhe në ekonominë globale.

Sipas raportimeve, trafiku detar në këtë zonë ishte reduktuar ndjeshëm edhe përpara deklaratës së Jabbari-t, për shkak të shqetësimeve për sigurinë, pasi disa cisterna nafte u sulmuan gjatë fundjavës mes përshkallëzimit të konfliktit mes SHBA-së, Izraelit dhe Iranit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)