Izraeli: Eliminuam komandantin kryesor iranian për Libanin

Ushtria izraelite ka deklaruar se ka vrarë një komandant të lartë të Forcës Quds të Iranit në një sulm në Teheran.

Sipas ushtrisë izraelite, është vrarë Daoud Ali Zadeh, i përshkruar si “komandant i përkohshëm” i Korpusit të Libanit të Forcës Quds dhe si komandanti iranian me gradën më të lartë përgjegjës për Libanin. Paraardhësi i tij, Hassan Mahdavi, ishte vrarë më herët në një tjetër sulm të IDF-së, sipas ushtrisë.

CNN nuk ka mundur ta konfirmojë në mënyrë të pavarur këtë pretendim dhe Irani nuk ka komentuar mbi të.

Forca Quds është njësi e Gardës Revolucionare, e cila merret me operacionet jashtë vendit. Sipas IDF-së, divizioni që drejtonte Zadeh mbështeste Hezbollah-un në ndërtimin e forcave të tij dhe shërbente si lidhja mes udhëheqjes së lartë të IRGC-së dhe Hezbollahut.

IDF tha se Korpusi i Libanit ishte ura lidhëse mes IRGC-së dhe Hezbollahut, milicia e mbështetur nga Irani në Liban, të cilën Izraeli e ka shënjestruar vazhdimisht që nga e hëna.

Pas pretendimit për vrasjen e Zadeh, zëdhënësi ushtarak izraelit, Avichay Adraee, paralajmëroi “të gjithë përfaqësuesit e mbetur të Ministrisë iraniane të Terrorit në Liban” që të largohen para se të shënjestrohen.

Sipas Adraee, “përfaqësuesit e regjimit” iranian kishin 24 orë kohë për t’u larguar.

“Pas këtij afati, asnjë vend në Liban nuk do të konsiderohet strehë e sigurt për personelin e regjimit iranian,” tha ai, duke shtuar se IDF do t’i godasë këto objektiva me forcë të plotë kudo që ndodhen.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)