Tragjedi në Kongo, mbi 200 viktima nga shembja e minierës

Të paktën 200 persona kanë humbur jetën pas shembjes së një miniere koltani në zonën e Rubayas, në lindje të Republikës Demokratike të Kongos. Lajmi është konfirmuar nga autoritetet lokale dhe është konfirmuar nga agjencia “Reuters”. Sipas zëdhënësit të guvernatorit provincial, Lubumba Kambere Muyisa, ngjarja ka ndodhur të mërkurën, më 28 janar.

Në një kohë kur mbetet ende për tu verifikuar numri i saktë i viktimave, raportohet se mes të vdekurve ka minatorë, gra dhe fëmijë që ndodheshin pranë zonës së tregut. Disa persona janë nxjerrë të gjallë nga rrënojat, por kanë pësuar plagë të rënda. Një këshilltar i guvernatorit ka deklaruar se deri tani janë konfirmuar të paktën 227 viktima.

Rubaya është një nga zonat kryesore të nxjerrjes së koltanit, duke prodhuar rreth 15% të sasisë botërore të këtij minerali. Më pas ai përpunohet në Tantal, i cili është një metal shumë i kërkuar në industrinë e telefonave celularë, kompjuterëve, teknologjisë ajrore dhe turbinave me gaz. Miniera shfrytëzohej kryesisht në mënyrë artizanale, me banorët lokalë që punonin manualisht për të siguruar të ardhura minimale.

Prej vitit 2024 zona ndodhet nën kontrollin e grupit rebel M23. Sipas Kombeve të Bashkuara, rebelët kanë shfrytëzuar burimet minerare të Rubayas për të financuar kryengritjen e tyre. Grupi i armatosur rëndë synon rrëzimin e qeverisë së Kinshasës dhe sipas deklarimeve zyrtare, mbrojtjen e pakicës tutsi në Kongo.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)