Vendimi i Kushtetueses pro PD-së për Rregulloren e Kuvendit, Balla: Presim vendimin e zbardhur

Kreu i grupit parlamentar të Partisë Socialiste, Taulant Balla ka dalë me një reagim pas vendimit të Gjykatës Kushtetuese e cila pranoi kërkesën e Partisë Demokratike dhe kërkoi shfyqizimin e ndryshimeve të reja në rregulloren e Kuvendit.

Balla deklaroi se për momentin të gjithë komisionet parlamentare nuk do të ndryshojnë, teksa shtoi se është në pritje të vendimit të zbardhur të Kushtetueses për këtë çështje.

“Nuk gjej dot asnjë lidhje mes të drejtës së Kuvendit për organizimin e punës së vet në komisione të përhershme dhe vendimit të sotëm të Gjykatës Kushtetuese. Pres me shumë kuriozitet vendimin e plotë për të kuptuar edhe atë çështjen e ‘të drejtës së shprehjes’, kur është fakt se deputetët kanë votuar dhe e kanë shprehur vullnetin qartazi me votë. Megjithatë mendoj se Kuvendi i Shqipërisë duhet ta vazhdojë punën e tij me ndarjen aktuale të Komisioneve, të cilat do duhet të rimiratohen bashkë me ndryshime të tjera që siç njoftova në fillim të sesionit do t’i depozitojmë në ditët në vijim”, shkruan Balla.

Gjykata Kushtetuese ka pranuar kërkesën e opozitës për ndryshimet në Rregulloren e Kuvendit të cilat u miratuan me nisjen e legjislaturës së re vetëm me votat e mazhorancës socialiste.

Anëtarët e Kushtetueses kërkuan shfuqizimin e ndryshimeve në rregulloren e Kuvendit, të cilat sipas tyre janë të papajtueshme me Kushtetutën e vendit.

Në arsyetimin e saj, Kushtetuesja shprehet se ndryshimet e reja duhet të shfuqizohen pasi cenojnë parimet e demokracisë përfaqësuese të lidhur me lirinë e shpresës së deputetëve si pasojë e shkeljes së rregullave të thirrjes së mbledhjes së Kuvendit, si dhe të procedurës së ndjekur për miratimin e rregullores.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)