Arrestimi i Maduros, BE: Mbështesim të drejtën e Venezuelës për vetëvendosje

Bashkimi Evropian rikonfirmoi edhe njëherë mbështetjen e tij për të drejtën e popullit të Venezuelës për të vendosur vetë për të ardhmen politike të vendit, në një moment tensionesh të larta politike pas arrestimit nga SHBA të liderit të vendit Nicolas Maduro.

Përfaqësuesja e Lartë e BE-së për Politikën e Jashtme, Kaja Kallas, reagoi përmes një postimi në platformën X, duke theksuar parimin e vetëvendosjes si thelbësor për daljen nga kriza.

“E drejta e popullit venezuelian për të vendosur për të ardhmen e vet duhet të respektohet”, shkroi Kallas.

Deklarata e saj është mbështetur nga të gjitha shtetet anëtare të Bashkimit Evropian, me përjashtim të Hungarisë.

BE-ja bëri të ditur se është në kontakt të vazhdueshëm me Shtetet e Bashkuara, si dhe me partnerë rajonalë dhe ndërkombëtarë, për të ndihmuar në gjetjen e një zgjidhjeje të negociuar, demokratike, gjithëpërfshirëse dhe paqësore për krizën në Venezuelë.

Në deklaratën e saj, Kallas theksoi gjithashtu rëndësinë e respektimit të së drejtës ndërkombëtare, duke nënvizuar se lufta kundër krimit të organizuar ndërkombëtar dhe trafikimit të drogës duhet të zhvillohet përmes bashkëpunimit afatgjatë dhe me respekt të plotë për integritetin dhe sovranitetin territorial të shteteve.

Një vëmendje e veçantë iu kushtua edhe situatës së të drejtave të njeriut, të cilat BE i konsideron thelbësore në këtë periudhë kritike për vendin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)