Artistët dolën kundë ICE-së, Trump i shpall ‘luftë’ Grammy-t dhe prezantuesit Trevor Noah: Jeni plehra!

Ceremonia e ndarjes së çmimeve Grammy e këtij viti ka shkaktuar polemika të forta politike, me Donald Trump që nisi një sulm të ashpër si ndaj institucionit ashtu edhe ndaj prezantuesit Trevor Noah, disa orë pas përfundimit të ceremonisë së ndarjes së çmimeve.

Përmes postimeve të tij në platformën Truth Social, presidenti amerikan i përshkroi çmimet Grammy si "çmimet më të këqija të të gjitha kohërave" dhe "pothuajse të pashikueshme", duke shtuar se rrjeti televiziv CBS është me fat që eventi nuk do të përfshihet më në agjendën e tij.

Në të njëjtën kohë, ai personalisht e shënjestroi Trevor Noah, duke e krahasuar ironikisht me Jimmy Kimmel dhe duke folur për vlerësime të ulëta të krahasueshme me atë të Oscarëve.

Arsyeja për zemërimin e Trump ishte një koment që Noah bëri në skenë, pas dhënies së çmimit të këngës së vitit për Billie Eilish. Prezantuesi me humor dhe ironi tha se çmimi është "pothuajse aq i kërkuar sa Groenlanda nga Trump", duke shtuar një pikë që lidhte Trump dhe Bill Clinton me ishullin e Jeffrey Epstein.

Në reagimin e tij pas ndarjes së çmimeve, Presidenti amerikan mohoi kategorikisht çdo lidhje me të ashtuquajturin "Ishulli Epstein", duke e cilësuar komentin e Noha-s "të rremë dhe shpifës" dhe duke kërcënuar hapur me veprime ligjore kundër tij.

"Çmimet Grammy janë më të këqijat, pothuajse e pamundur për t'u parë! CBS është me fat që këto mbeturina nuk janë më në programin e tyre televiziv. Prezantuesi, Trevor Noah - kushdo që të jetë ai - është pothuajse aq i keq sa Jimmy Kimmel në Oscar me shikueshmëri të ulët. Noah tha, gabim, se unë dhe Bill Clinton kaluam kohë në ishullin e Epstein. Gabim!!! Nuk mund të flas në emër të Bill, por unë nuk kam qenë kurrë në ishullin e Epstein, ose diku afër tij, dhe deri sonte, me këtë deklaratë të rreme dhe shpifëse, asgjë e tillë nuk është thënë kurrë, madje as nga media e lajmeve të rreme. Noah, një humbës total, më mirë t'i sqarojë faktet e tij shpejt dhe me saktësi. Duket se do t'i dërgoj avokatët e mi për të paditur këtë prezantues patetik, pa talent dhe të paaftë, që kërkon shumë para. Pyete "të voglin" George Stephanopoulos dhe të tjerët se si përfundoi e gjithë kjo. Pyete edhe CBS! Përgatitu, Noah. Do të kaloj mirë me ty!", shkroi Trump në Truth Social.

Artistët sulmuan politikat e Trump

Bad Bunny, këngëtari i reggaeton dhe latin trap nga Porto Riko, u bë artisti i parë që fitoi një çmim Grammy për albumin më të mirë të vitit të dielën me një album tërësisht në spanjisht dhe ua kushtoi çmimin e tij emigrantëve, në një natë gjatë së cilës shumë artistë folën kundër politikës së imigracionit të Presidentit të SHBA-së Donald Trump.

31-vjeçari portorikan fitoi gjithsej tre çmime, përfshirë albumin më të mirë për albumin e tij “Debi Tirar Mas Foros”.

Që nga skena e ndarjes së çmimeve, Bad Bunny nuk i kurseu fjalët kundër politikave të Trump.

“Para se të falënderoj Zotin, do të them ICE jashtë”, duke iu referuar policisë amerikane të imigracionit që është në qendër të tensionit në Minneapolis pas plagosjes fatale të dy qytetarëve amerikanë.

“Ne nuk jemi të egër, nuk jemi kafshë, nuk jemi të huaj, jemi njerëz dhe jemi amerikanë”, theksoi Bad Bunny duke u bërë thirrje amerikanëve të mos lejojnë që “urrejtja t’i kontaminojë”.

Të dielën e ardhshme, ai do të këndojë në finale e Super Bowl, finalja e kampionatit amerikan të futbollit dhe paraqitja e tij është kritikuar tashmë nga mbështetësit e Trump, të cilët e akuzojnë Bad Bunny se këndon në spanjisht dhe se flet në favor të emigrantëve dhe komunitetit LGBTQ+.

Bad Bunny ndërkohë ka vendosur që turneun e tij ndërkombëtar, i cili filloi në nëntor, nuk do ta zhvillojë nëpër Shtetet e Bashkuara për të mbrojtur audiencën e tij nga bastisjet e mundshme të ICE.

Slogani "ICE jashtë" ishte shkruar po ashtu në gjilpërat që mbanin, ndër të tjera, këngëtarët Kehlani, Joni Mitchell dhe Justin Vernon të grupit Bon Iver.

Vernon vuri në dukje se mbante veshur edhe një bilbil si një homazh për qytetarët amerikanë që monitorojnë dhe regjistrojnë veprimet e agjentëve federalë të imigracionit në rrugët e Shteteve të Bashkuara.

Billie Eilish, e cila fitoi çmimin për këngën e vitit me "Wildflower", bëri thirrje për "të vazhduar të luftojmë, të flasim dhe të protestojmë”. “Zërat tanë kanë vërtet rëndësi dhe njerëzit kanë rëndësi", shtoi ajo. Artistja tha gjithashtu se "askush nuk është i paligjshëm në tokën e vjedhur".

Artistë të tjerë gjithashtu i bënë homazh emigrantëve: "Ata rindërtuan vendin", thirri Shaboozey, prindërit e të cilit janë nga Nigeria.

E lindur nga një baba britanik dhe një nënë me prejardhje nga Xhamajka dhe Gujana, britanikja 26-vjeçare Olivia Dean, e cila u nderua me çmimin Grammy për artisten më të mirë të re të vitit, përshëndeti "guximin" e emigrantëve.

SZA, e cila fitoi çmimin për albumin “Albumi i Vitit” me këngën “Luther” së bashku me reperin Kendrick Lamar, i nxiti amerikanët të mos dëshpërohen. “E di që jetojmë në kohë të frikshme, por duhet t’i besojmë njëri-tjetrit dhe vetes”.

Prezantuesi i çmimeve Grammy, Trevor Noah, komentoi mbi situatën aktuale politike në Shtetet e Bashkuara, duke thënë se "himni i ri kombëtar" i vendit duhet të jetë kënga "Anxiety" e reperit Doechii.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)