Skandali në Greqi, policia përdori “mercenarë” për të sulmuar emigrantët e paligjshëm

Një investigim i gjerë i BBC ka ngritur akuza serioze ndaj autoriteteve greke për përdorimin e emigrantëve si “mercenarë” në kufirin tokësor me Turqinë, në rajonin e Evrosit.

Sipas raportimit, këta persona dyshohet se janë rekrutuar për të ndaluar dhe kthyer me forcë emigrantë të tjerë, shpesh duke përdorur dhunë ekstreme.

Dëshmi të mbledhura nga gazetarët përfshijnë dokumente të brendshme policore, rrëfime emigrantësh dhe ish-pjesëtarësh të këtyre grupeve, si dhe burime nga vetë policia. Sipas tyre, emigrantët e rekrutuar janë përdorur për të kryer  kthime të detyruara përtej kufirit pa procedura ligjore, të cilat konsiderohen të paligjshme sipas të drejtës ndërkombëtare.

Disa dëshmitarë pretendojnë se emigrantët janë rrahur deri në humbje ndjenjash, janë grabitur dhe madje janë abuzuar seksualisht. Një grua siriane ka deklaruar se vajzës së saj të mitur iu hoq pelena gjatë kontrollit për sende me vlerë, ndërsa një tjetër emigrant pohon se u rrah nga policia dhe më pas u dorëzua tek persona të maskuar.

Raporti përmend gjithashtu se këta “mercenarë” shpesh shpërbleheshin me para, telefona të konfiskuar ose dokumente që u lejonin lëvizje më të lirë në Greqi. Një ish-pjesëmarrës nga Maroku tha se ishte detyruar të bashkëpunonte nga frika e dhunës.

Autoritetet greke kanë mohuar akuzat në përgjithësi, ndërsa kryeministri është shprehur se nuk ka dijeni për përdorimin e emigrantëve në këtë mënyrë.

Ndërkohë, organizatat për të drejtat e njeriut e cilësojnë këtë si një shkelje shumë të rëndë, duke theksuar se praktika të tilla cenojnë rëndë dinjitetin dhe sigurinë e njerëzve në kërkim të mbrojtjes.

Hetimet vazhdojnë dhe pritet që çështja të ketë pasoja të rëndësishme në nivel europian.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)