“Mjafton të tregoni respekt”, Putin premton se nuk do të ketë më luftëra

Presidenti i Rusisë, Vladimir Putin ka bërë një deklaratë bujshme duke thënë se nuk do të ketë asnjë luftë tjetër pas Ukrainës, nëse vendi i tij trajtohej me respekt nga Perëndimi.

Në një intervistë për gazetarin e BBC, Steve Rosenberg që zgjati më shumë se 4 orë, lideri rus shtoi se pretendimet se Moska po përgatitet të sulmoje edhe vende të tjera të Evropës janë të pakuptimta.

«Nuk do të ketë asnjë operacion nëse na trajtoni me respekt, nëse respektoni interesat tona ashtu siç ne jemi përpjekur gjithmonë të respektojmë tuajat», tha Putin.

Vërejtjet e tij ishin në përputhje me një koment të kohëve të fundit, në të cilin ai tha se Rusia nuk po planifikonte të shkonte në luftë, por ishte gati "tani" nëse Evropa donte.

Ai shtoi gjithashtu kushtin, "nëse nuk na mashtroni siç na mashtruat me zgjerimin e NATO-s drejt lindjes".

Maratona e BBC kombinoi pyetje nga publiku dhe gazetarë nga e gjithë Rusia në një sallë në Moskë, me Putinin të ulur nën një hartë gjigante të Rusisë që përfshinte zonat e pushtuara të Ukrainës, përfshirë Krimenë.

Televizioni shtetëror rus pretendon se në drejtim të presidentit rus ishin bërë më shumë se 3 milionë pyetje.

Putin foli mes të tjerash për ekonominë e Rusisë, rritjen e çmimeve, çështjet e politikës së jashtme, të cilat u përzienë me lëvdata për bizneset lokale, çmimet e peshkut dhe rëndësinë e kujdesit për veteranët.

Në lidhje me luftën në Ukrainë, Putin u shpreh gati dhe vullnetplotë për ta ndalur atë, por nuk tha sesi mund të arrihet një kompromis.

Ai përsëriti se forcat ukrainase duhet të largoheshin nga katër rajone të pushtuara pjesërisht nga Rusia dhe që Kievi të hiqte dorë nga përpjekjet e tij për t'u bashkuar me NATO-n.

Shumica e pyetjeve nga media ruse ose nga publiku bënë pak përpjekje për të sfiduar Putinin, por u lejuan dy nga korrespondentët perëndimorë, Keir Simmons i rrjetit amerikan NBC dhe Steve Rosenberg i BBC-së.

Kur Simmons pyeti nëse Putin do të ndihej përgjegjës për vdekjet e ukrainasve dhe rusëve nëse do të refuzonte planin e paqes të Trump, Putin vlerësoi përpjekjet "e sinqerta" të presidentit amerikan për t'i dhënë fund luftës, por tha se ishte Perëndimi, jo Rusia, që po bllokonte një marrëveshje.

"Topi është në duart e kundërshtarëve tanë perëndimorë", tha ai, "kryesisht udhëheqësve të regjimit të Kievit, dhe në këtë rast, para së gjithash, sponsorëve të tyre evropianë".

Putin i tha në mbyllje redaktorit të BBC-së për Rusinë: “Ne jemi të gatshëm të punojmë me ju - me Mbretërinë e Bashkuar dhe me Evropën në përgjithësi dhe me Shtetet e Bashkuara, por si të barabartë, me respekt të ndërsjellë për njëri-tjetrin”

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)