50 mijë paunde për një dërgesë, dronët “pushtojnë” burgjet, teknika për të futur telefona e drogë

Bandat kriminale po përdorin gjithnjë e më shumë dronë për të futur kontrabandë në burgjet britanike, duke përfituar shuma marramendëse që, sipas burimeve, mund të arrijnë deri në 50 mijë paund për çdo dorëzim. Fenomeni është rritur ndjeshëm vitet e fundit, me burgun HMP Manchester, i njohur si Strangeways, që ka regjistruar të paktën 220 raste hedhjeje kontrabande me dronë brenda vetëm 12 muajve, shifra më e lartë në Angli dhe Uells.

Grupet kriminale zakonisht veprojnë në ekipe prej dy personash dhe përdorin dronë të telekomanduar, me kosto që varion nga disa qindra deri në dhjetëra mijëra paund. Përmes tyre futen telefona celularë, drogë dhe madje edhe ushqime nga restorante të njohura. Sipas një ish-të dënuari, një telefon i thjeshtë mund të shitet brenda burgut për rreth 2 mijë paund, ndërsa droga sintetike apo kokaina arrin vlera deri në 1 mijë paund për sasi të vogla.

I njëjti burim pohon se disa banda fitojnë deri në 50 mijë paund për një fluturim të vetëm, duke transportuar disa telefona dhe sasi droge njëkohësisht. Në këto operacione përfshihet një pilot droni, i quajtur “shqiponja”, dhe një vrojtues që koordinon dorëzimin me të burgosurit.

Sipas Ministrisë së Drejtësisë, vitin e kaluar u regjistruan mbi 1 mijë raste të tilla në të gjithë sistemin e burgjeve. Autoritetet paralajmërojnë se telefonat ilegalë përdoren për trafik droge, planifikim dhune dhe madje edhe sulme të rënda. Qeveria britanike ka njoftuar investime prej 40 milionë paundësh për masa sigurie, përfshirë teknologji kundër dronëve, për të frenuar këtë kërcënim në rritje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)