Trump pas takimit me Zelensky-n: Po i afrohemi shumë paqes në Ukrainë

Presidenti i SHBA-së, Donald Trump, deklaroi se Ukraina dhe Rusia janë “më afër se kurrë më parë” arritjes së një marrëveshjeje paqeje, pas një takimi të zhvilluar me presidentin ukrainas Volodymyr Zelensky në resortin e tij në Florida. Megjithatë, Trump pranoi se negociatat mbeten komplekse dhe se ekziston ende rreziku që procesi të dështojë, duke e zgjatur luftën për vite të tjera.

Deklaratat e presidentit amerikan erdhën pas një bisede telefonike dy orë e gjysmë me presidentin rus Vladimir Putin, të cilën Trump e cilësoi si “shumë të mirë”. Lufta në Ukrainë, e nisur nga pushtimi rus gati katër vite më parë, mbetet një nga konfliktet më të rënda në Evropë që nga Lufta e Dytë Botërore.

“Rusia dëshiron ta shohë Ukrainën të ketë sukses,” tha Trump gjatë një konference për shtyp ku doli krah për krah me Zelensky-n, duke e quajtur homologun e tij “të guximshëm”. Ai theksoi se beson ende që Putin është serioz në përpjekjet për t’i dhënë fund luftës, edhe pse Rusia vijoi sulmet ndaj objektivave ukrainase gjatë udhëtimit të Zelensky-t drejt SHBA-së, shkruan Newsmax.

Të dy liderët pranuan se disa çështje kyçe mbeten të pazgjidhura, veçanërisht statusi i territoreve ukrainase të kontrolluara nga Rusia dhe garancitë e sigurisë për Ukrainën, për të shmangur një pushtim të ri në të ardhmen. Pas takimit, Trump dhe Zelenskyy zhvilluan një telefonatë me një grup të gjerë liderësh evropianë, përfshirë presidenten e Komisionit Evropian Ursula von der Leyen dhe drejtuesit e Finlandës, Francës, Gjermanisë, Mbretërisë së Bashkuar dhe Polonisë.

Zelensky bëri të ditur se Trump kishte rënë dakord të organizojë një tjetër takim me liderët evropianë, ndoshta në Shtëpinë e Bardhë, gjatë muajit janar. “Ukraina është gati për paqe,” tha presidenti ukrainas, duke falënderuar Trump për përpjekjet e tij.

Ndërkohë, këshilltari i Putinit për politikën e jashtme, Yuri Ushakov, deklaroi se për një armëpushim të plotë nevojitet një “vendim i guximshëm politik nga Kievi”, veçanërisht lidhur me rajonin e Donbasit. Pikërisht e ardhmja e këtij rajoni mbetet pika më e nxehtë e mosmarrëveshjeve.

Trump pranoi se negociatat mund të dështojnë. “Në disa javë do ta dimë nëse do të ecë apo jo,” tha ai. “Mjafton një çështje e madhe për ta prishur gjithçka.”

Sipas Zelensky-t, një draft-marrëveshje me 20 pika është rreth 90% gati, ndërsa SHBA-ja ka pranuar të ofrojë garanci sigurie për Ukrainën, të ngjashme me ato të NATO-s. Megjithatë, kërkesat ruse për territor, neutralitet dhe kufizim të ushtrisë ukrainase vazhdojnë të mbeten pengesa serioze drejt paqes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)