Britania vendos aeroplanmbajtësen e saj kryesore pranë Groenlandës

Kryeministri britanik, Keir Starmer, ka njoftuar dërgimin e një flote drejt Atlantikut të Veriut dhe Arktikut, të udhëhequr nga aeroplanmbajtësja “Prince of Wales”, për të garantuar sigurinë e Groenlandës. Vendimi vjen si përgjigje ndaj kërkesave të përsëritura të presidentit amerikan Donald Trump lidhur me territorin arktik.

Gjatë fjalës së tij, Starmer theksoi rëndësinë e forcimit të bashkëpunimit me Bashkimin Evropian, si në fushën e mbrojtjes ashtu edhe në ekonomi. Ai e cilësoi Evropën si një “gjigant të fjetur”, duke nënvizuar se siguria britanike është e pandashme nga ajo evropiane.

“Nuk ka siguri britanike pa Evropën, ashtu siç nuk ka siguri evropiane pa ne”, deklaroi ai, duke shtuar se në një botë gjithnjë e më të rrezikshme, izolimi nuk është zgjidhje.

Sipas Starmer, dislokimi i aeroplanmbajtëses “Prince of Wales”, anija flamurtare e marinës britanike, së bashku me anije të tjera luftarake, synon të forcojë praninë e Londrës në strukturën e sigurisë euroatlantike dhe të ofrojë garanci konkrete për Groenlandën.

Kryeministri britanik përmendi edhe angazhimin e vendit të tij në kuadër të NATO-s, duke theksuar se përkushtimi ndaj nenit 5 të traktatit mbetet i palëkundur. Ai kujtoi ndërhyrjen e përbashkët në Afganistan si shembull të solidaritetit mes aleatëve, pavarësisht kostove të larta njerëzore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)