“Roboti” ukrainas i bën gjëmën ushtrisë ruse, teknologjia që po kthen luftën

Forcat ukrainase kanë arritur të marrin një pozicion rus duke përdorur vetëm robotë të armatosur dhe dronë, në një zhvillim që tregon një ndryshim të shpejtë drejt luftës së automatizuar.

Lajmi u konfirmua nga presidenti Volodymyr Zelensky, i cili theksoi se operacioni u krye pa rrezikuar jetën e asnjë ushtari ukrainas.

“Për herë të parë në këtë luftë, një pozicion armik u mor vetëm nga sisteme pa pilot, robotë tokësorë dhe dronë. Forcat ruse u dorëzuan pa përfshirjen e këmbësorisë dhe pa humbje nga ana jonë”, deklaroi Zelensky.

Sipas tij, gjatë tre muajve të fundit janë realizuar mbi 22 mijë misione me robotë, duke shpëtuar mijëra jetë ushtarësh. Ukraina synon të prodhojë mbi 20 mijë robotë të tillë gjatë këtij viti, shumica e të cilëve prodhohen brenda vendit.

Këta robotë tokësorë përdoren për sulme, evakuimin e të plagosurve dhe çminimin e zonave të rrezikshme. Një nga modelet, i njohur si DevDroid, është i pajisur me mitraloz të rëndë dhe mund të kontrollohet nga distanca ose përmes inteligjencës artificiale.

Në një rast të mëparshëm, një robot i tillë mbrojti një pozicion në frontin lindor për 45 ditë rresht pa praninë e ushtarëve, duke zmbrapsur sulmet ruse. Madje, trupat ruse nuk arritën të kuptonin se po përballeshin me një sistem të automatizuar.

Pamje të publikuara më herët tregojnë edhe raste kur ushtarë rusë dorëzohen përballë robotëve të armatosur ukrainas.

Zhvillimi i këtyre teknologjive po ndryshon natyrën e luftës në Ukrainë, duke reduktuar rrezikun për ushtarët dhe duke rritur përdorimin e inteligjencës artificiale në fushën e betejës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)