Netanyahu mund t’i propozojë Trumpit sulme të reja kundër Iranit

Kryeministri izraelit Benjamin Netanyahu pritet t’i paraqesë presidentit të SHBA-së, Donald Trump, një sërë opsionesh për sulme të reja të mundshme ndaj Iranit, gjatë një takimi që mund të zhvillohet më vonë këtë muaj në Florida. Burime izraelite bëjnë me dije se shqetësimi kryesor i Tel Avivit lidhet me rindërtimin dhe zgjerimin e kapaciteteve ushtarake iraniane, të dëmtuara nga sulmet e mëparshme.

Sipas zyrtarëve izraelitë, Irani ka intensifikuar prodhimin e raketave balistike pas goditjeve të këtij viti, duke e kthyer këtë program në kërcënim të menjëhershëm për sigurinë e Izraelit. Po ashtu, Teherani dyshohet se po riparon sistemet e mbrojtjes ajrore dhe, në një shkallë më të kufizuar, po përpiqet të ringrejë infrastrukturën e pasurimit bërthamor që u godit nga bombardimet amerikane në qershor, shkruan Newsmax.

Në takim, Netanyahu pritet t’i paraqesë Trumpit disa skenarë ushtarakë, që variojnë nga veprime të njëanshme të Izraelit, operacione të përbashkëta me SHBA-në, mbështetje amerikane për sulme izraelite, deri te një rol udhëheqës i vetë Uashingtonit. Këto opsione janë të ngjashme me ato që Izraeli kishte diskutuar me Trump përpara operacionit amerikan të quajtur “Midnight Hammer”.

Megjithatë, përpjekjet izraelite për të siguruar mbështetje për veprime të reja ushtarake mund të ndërlikohen nga sinjalet e Iranit për rifillim të bisedimeve diplomatike me SHBA-në. Vetë Trump ka paralajmëruar publikisht Teheranin që të mos rindërtojë kapacitetet raketore apo bërthamore, duke theksuar se SHBA-ja mund të godasë sërish shpejt nëse Irani vepron pa një marrëveshje.

Përveç çështjes iraniane, në agjendën e takimit pritet të jetë edhe armëpushimi i brishtë mes Izraelit dhe Hamasit, faktor që mund të ndikojë në marrëdhëniet më të gjera SHBA-Izrael në javët në vijim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)