Nisin në Oman negociatat ndërmjet SHBA dhe Iranit, Araghchi kërkon “respekt reciprok”

Kanë nisur zyrtarisht në Muskat të Omanit bisedimet bilaterale ndërmjet Shteteve të Bashkuara dhe Iranit rreth programit bërthamor iranian. Lajmi është raportuar nga agjencia iraniane “Mehr”. Delegacionin e Teheranit e kryeson ministri i Jashtëm, Abbas Araghchi. Në anën tjetër, Shtetet e Bashkuara përfaqësohen nga i dërguari special për Lindjen e Mesme, Steve Witkoff. Omani vepron si ndërmjetës në këto negociata delikate.

Nga pala iraniane është theksuar nevoja për “respekt të ndërsjellë”. Teherani ka paralajmëruar se do të mbrohet nga çdo kërkesë e tepruar apo nga çdo formë aventurizmi e amerikanëve. Sipas gazetës izraelite “Haaretz”, negociatat janë të kufizuara vetëm në çështjen e programit bërthamor iranian dhe nuk përfshijnë tema të tjera rajonale apo ushtarake.

Sipas “Wall Street Journal”, në bisedime po merr pjesë edhe komandanti i Komandës Qendrore të SHBA-së, admirali Brad Cooper. Gazeta thekson se prania e një zyrtari të lartë ushtarak në negociata diplomatike të këtij niveli nuk është e zakonshme, por presidenti amerikan Donald Trump ka vendosur të përfshijë drejtues të lartë ushtarakë në këtë proces.

Një konvoj automjetesh, ku besohet se ndodheshin zyrtarë amerikanë, është larguar nga vendi ku u zhvilluan bisedimet, rreth një orë e gjysmë larg kryeqytetit të Omanit. Zyrtarët amerikanë nuk kanë bërë deklarata për mediat. Ndërkohë, përfaqësuesit iranianë kishin mbërritur në vendin e negociatave përpara delegacionit amerikan.

Agjencia “Mehr” raporton se ministri i Jashtëm iranian Abbas Araghchi është rikthyer pasdreke në selinë e bisedimeve, ku pritet të zhvillohet një raund i ri negociatash mes dy palëve. Ndërkohë, Kremlini ka shprehur mbështetje për dialogun mes Iranit dhe Shteteve të Bashkuara. Zëdhënësi Dmitry Peskov ka deklaruar se Rusia shpreson që këto bisedime të çojnë drejt një uljeje të tensioneve dhe u ka bërë thirrje të gjitha palëve të tregojnë përmbajtje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)