Mes tensioneve e kërcënimeve, mbyllet bisedimet SHBA-Iran në Oman

Shtetet e Bashkuara dhe Irani kanë mbyllur të premten bisedime në Oman, në një përpjekje për të ulur tensionet mes dy vendeve pas përshkallëzimit të fundit ushtarak në Lindjen e Mesme. Këto ishin negociatat e para mes Uashingtonit dhe Teheranit që nga goditjet e SHBA-së dhe Izraelit ndaj Iranit verën e kaluar.

Sipas një burimi të CNN, të dyja palët kanë rënë dakord të zhvillojnë raunde të tjera bisedimesh pas konsultimeve, një zhvillim që shihet me kujdes si pozitiv. Negociatat u zhvilluan në një klimë të tensionuar, ndërsa SHBA ka shtuar praninë ushtarake në rajon dhe presidenti amerikan Donald Trump ka paralajmëruar Iranin me pasoja të rënda nëse refuzon një marrëveshje bërthamore apo përdor forcë vdekjeprurëse ndaj protestuesve.

Bisedimet u ndërmjetësuan nga ministri i Jashtëm i Omanit, Badr Albusaidi, i cili u takua veçmas me delegacionet. Nga pala iraniane mori pjesë ministri i Jashtëm Abbas Araghchi, ndërsa SHBA u përfaqësua nga i dërguari Steve Witkoff dhe Jared Kushner. Në takim u pa edhe komandanti i CENTCOM-it, admirali Brad Cooper.

Sipas mediave iraniane, Araghchi paraqiti një plan paraprak për menaxhimin e situatës aktuale, i cili iu përcoll palës amerikane. Megjithatë, mbetet e paqartë se sa e gjerë ishte agjenda e diskutimeve. Irani këmbëngul që fokusi të jetë vetëm programi bërthamor, ndërsa SHBA kërkon përfshirjen e çështjeve si raketat balistike, grupet aleate të Iranit në rajon dhe shtypja e protestave.

Një nga pikat kryesore të përplasjes mbetet pasurimi i uraniumit, të cilin Irani e sheh si të drejtë sovrane, ndërsa SHBA dhe aleatët e saj e kundërshtojnë. Pas përfundimit të bisedimeve, Uashingtoni vendosi sanksione të reja ndaj naftës iraniane, duke sinjalizuar vazhdimin e presionit ekonomik.

Pavarësisht dialogut, rreziku i një konflikti të gjerë mbetet real. Ekspertët paralajmërojnë se një luftë e re do të kishte pasoja të rënda për rajonin dhe ekonominë globale, ndërsa bisedimet shihen si një shans për të shmangur përplasjen ushtarake.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)