Irani pretendon për sulm mbi centralin bërthamor të Natanzit, Izraeli e mohon, Rusia e dënon

Organizata e Energjisë Atomike e Iranit tha se objekti i pasurimit të uraniumit “Shahid Ahmadinejad” në Natanz është goditur ditën e sotme, duke akuzuar SHBA-të dhe Izraelin për një sulm kriminal.

Sulmi, sipas palës iraniane shkeli ligjin ndërkombëtar dhe angazhimet siç është Traktati për Mospërhapjen Bërthamore dhe rregulloret e tjera të sigurisë bërthamore.

“Pas sulmeve kriminale të kryera nga Shtetet e Bashkuara dhe regjimit uzurpues sionist kundër vendit tonë, kompleksi i pasurimit të Natanzit u shënjestrua këtë mëngjes", tha Organizata e Energjisë Atomike e Iranit, duke shtuar se "nuk është raportuar asnjë rrjedhje e materialeve radioaktive" në zonë.

Drejtori i Agjencisë Ndërkombëtare të Energjisë Atomike (IAEA), Rafael Grossi, i cili u "informua nga Irani" për sulmin, bëri thirrje për "përmbajtje ushtarake në mënyrë që të shmanget çdo rrezik i një aksidenti bërthamor".

Ndërkohë, të pyetur nga Agence France-Presse, ushtria izraelite tha se "nuk ishte në dijeni të një sulmi" ndaj Natanzit.

Irani kishte akuzuar tashmë SHBA-në dhe Izraelin për sulmin ndaj objektit në fillim të marsit në fillim të luftës.

Foto: AP

Natanz, i vendosur rreth 220 kilometra në juglindje të Teheranit, ishte shënjestër e sulmeve izraelite gjatë luftës 12-ditore Iran-Izrael në qershor 2025, dhe më pas u godit nga Shtetet e Bashkuara.

Në qershor, Shtetet e Bashkuara kryen sulme ndaj tre objekteve bërthamore iraniane, në Natanz, Fordoë dhe Isfahan, me Trump që deklaroi se sulmet "shkatërruan plotësisht" programin bërthamor iranian.

Sakaq, dëshira për të eliminuar kërcënimin bërthamor iranian ka qenë një qëllim i deklaruar i Presidentit të SHBA-së Donald Trump që nga fillimi i sulmit më 28 shkurt, pasi Shtëpia e Bardhë dyshon se Republika Islamike po kërkon të sigurojë një bombë atomike, diçka që ajo e mohon.

Ndërkohë, Rusia ka dënuar sulmin ndaj objekteve të Natanzit përmes një deklarate të Ministrisë së Jashtme.

Zëdhënësja e Ministrisë ruse, Maria Zakharova, e quajti atë një "shkelje flagrante të ligjit ndërkombëtar".

Edhe kryeministri indian Narendra Modi njoftoi në ‘X’ se foli me presidentin iranian Masud Peskov. Modi dënoi sulmet ndaj infrastrukturës kritike në Lindjen e Mesme, ndërsa theksoi rëndësinë e lundrimit të sigurt dhe të hapur.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)