Adoleshenca zgjat deri në të 30-tat, e zbulon studimi i ri

Një studim shkencor ka zbuluar se truri i njeriut nuk zhvillohet në mënyrë të vazhdueshme nga lindja deri në vdekje, por kalon në pesë faza të dallueshme, me kthesa të rëndësishme në moshat 9, 32, 66 dhe 83 vjeç. Zbulimi vjen pas analizimit të rreth 4,000 skanimeve të trurit të njerëzve deri në moshën 90 vjeç nga Universiteti i Cambridge.

Sipas studiuesve, truri qëndron në fazën e adoleshencës deri në fillim të të 30-ave, kur ai arrin “kulmin” e efikasitetit. Kjo qasje e re mund të ndihmojë në kuptimin e rritjes së rrezikut për çrregullime mendore dhe demencë në periudha të caktuara të jetës.

Pesë fazat e trurit janë si vijon:
Fëmijëria (0–9 vjeç) – Truri rritet me shpejtësi dhe njëkohësisht eliminon lidhjet e tepërta mes qelizave nervore. Efikasiteti ulet përkohësisht.
Adoleshenca (9–32 vjeç) – Fillon një fazë e fuqishme riorganizimi, ku truri bëhet më efikas se kurrë. Kjo periudhë lidhet edhe me rrezikun më të lartë për çrregullime mendore.
Të rriturit (32–66 vjeç) – Truri hyn në fazën më të qëndrueshme, por efikasiteti fillon gradualisht të bjerë.
Plakja e hershme (66–83 vjeç) – Lidhjet neuronale fillojnë të fragmentohen, ndërsa pjesë të trurit punojnë më të ndara nga njëra-tjetra.
Plakja e vonë (83+) – Ndryshimet bëhen më të theksuara, megjithëse të dhënat janë më të kufizuara për këtë grupmoshë.

Dr. Alexa Mousley tha se ishte “befasuese” sa qartë dilnin këto ndryshime në të dhëna. Ndërkohë, ekspertë e quajtën studimin “shumë të vlefshëm”, por theksuan se ndryshimet individuale mund të jenë të mëdha.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)