Bashkia e Tiranës hap aplikimet për 1,500 kredi të buta, zbardhen kushtet e aplikimit

Këshilli Bashkiak i Tiranës ka miratuar 1,500 kuota të reja për programin e kredive të buta, në mbështetje të familjeve që synojnë të blejnë një banesë në kryeqytet. Vendimi vjen në përgjigje të rritjes së kërkesave për përfshirje në programin social të subvencionimit të interesave të kredisë.

Gjatë mbledhjes së Këshillit Bashkiak, Kryetarja e deleguar e Bashkisë së Tiranës, Anuela Ristani, deklaroi se pas interesit në rritje të qytetarëve, është parashikuar financimi i kuotave të reja nga buxheti.

“Bashkia Tiranë, duke konsideruar trendin në rritje të kërkesave për programin social të ‘Subvencionimit të Interesave të Kredisë’, ka planifikuar në programin buxhetor afatmesëm 2026–2028 mbulimin e 1,500 kuotave të reja me fondet e saj”, deklaroi Ristani.

Programi synon të mbështesë familjet dhe individët që nuk kanë banesë në pronësi, ose zotërojnë një sipërfaqe nën normat e strehimit, nuk kanë kryer tjetërsim prone në 5 vitet e fundit dhe nuk përballojnë dot normën e interesit të tregut për blerjen e një banese.

“Programi i subvencionimit të interesave të kredisë mbështet familjet dhe individët që nuk kanë banesë në pronësi ose zotërojnë sipërfaqe nën normat e strehimit, nuk kanë kryer tjetërsim prone në 5 vitet e fundit dhe nuk përballojnë dot normën e interesit të tregut për blerjen e një banese”, u shpreh Ristani.

Sipas saj, miratimi i këtij projektvendimi synon të rrisë aksesin në pronësi për familjet e reja dhe të lehtësojë barrën financiare të interesit bankar.

“Ky projektvendim rrit aksesin në pronësi për familjet e reja, ul barrën financiare të interesit bankar, ndihmon stabilitetin social dhe demografik, si edhe forcon rolin e Bashkisë Tiranë si aktor aktiv në politikat sociale”, përfundoi Ristani.

Si aplikohet për kredinë e butë?

Procesi i aplikimit zhvillohet në dy faza:

• Aplikimi kryhet online përmes portalit e-Albania
• Afati i aplikimit: 30 ditë
• Shpallja publike e listave të aplikantëve

• Dorëzimi i dokumenteve fizikisht ose me postë
• Verifikimi administrativ: 30 ditë
• Shqyrtimi nga Komisioni i Strehimit: 45 ditë

Autoritetet bëjnë me dije se në çdo fazë të procesit parashikohet e drejta e ankimimit, duke garantuar një proces të rregullt dhe transparent administrativ.

Programi i kredive të buta konsiderohet një nga instrumentet kryesore të politikave sociale të Bashkisë së Tiranës për të mbështetur familjet e reja dhe shtresat në nevojë në sigurimin e një banese. Gjatë thirrjes për aplikime të realizuar për vitin 2025, u shpallën fitues 1,231 individë apo familje, me fondet e buxhetit të shtetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)