Delcy Rodríguez, “tigri” që do të jetë pasardhësja e Maduro

Pas arrestimit të ish-presidentit Nicolás Maduro nga Shtetet e Bashkuara, zv.presidentja ekzekutive Delcy Rodríguez rezulton të jetë e para në listën e pasardhësve të pushtetit dhe kandidatja më e mundshme për të marrë drejtimin e Venezuelës.

Gjykata Supreme e Venezuelës e ka emëruar zyrtarisht Rodríguez si presidente të përkohshme, me qëllim garantimin e vazhdimësisë administrative dhe mbrojtjes së integritetit të shtetit, siç deklaroi kryetarja e Dhomës Kushtetuese, Tania D’Amelio.

Ndërkohë, liderja e opozitës dhe fituese e Çmimit Nobel për Paqen, Maria Corina Machado, reagoi duke thënë: “Ka ardhur ora e lirisë”. Megjithatë, emri i saj nuk duket të gëzojë mbështetjen e Uashingtonit. Presidenti amerikan Donald Trump, duke folur nga Mar-a-Lago për atë që e cilësoi si një “operacion të jashtëzakonshëm nga ajri, toka dhe deti”, deklaroi se Machado “nuk ka mbështetjen e nevojshme për të udhëhequr vendin”.

Sipas Trump, Delcy Rodríguez do ta kishte këtë mbështetje, të paktën në aspektin institucional. Megjithatë, Sekretari amerikan i Shtetit, Marco Rubio, në një intervistë për “New York Times”, u shpreh se preferon të pezullojë gjykimin mbi deklaratat e Rodríguez.

Vetë zv.presidentja mohoi çdo lloj bashkëpunimi me SHBA-të pas arrestimit të atij që e quajti “i vetmi president legjitim i Venezuelës”. Kjo deklaratë erdhi pasi Trump kishte pohuar se Rodríguez, gjatë një bisede me Rubion, ishte shprehur e hapur për bashkëpunim si presidente e përkohshme.

Në një fjalim të ashpër në televizionin shtetëror, Rodríguez denoncoi atë që e quajti një “sulm brutal” nga ana e Shteteve të Bashkuara. Vetëm pak orë pas arrestimit të Maduro-s, ajo kërkoi prova se presidenti ishte ende gjallë, duke e cilësuar ngjarjen si “një agresion kundër vendit” dhe “një rrëmbim të paligjshëm”.

Për më tepër, Rodríguez shtoi se qeveria është e gatshme të mbrojë burimet energjetike dhe minerare të vendit dhe të ndjekë “rrugën e mbrojtjes së paqes”. Ajo bëri thirrje për qetësi dhe unitet kombëtar, duke ftuar popullin, forcat e sigurisë dhe ushtrinë që të veprojnë si “një trup i vetëm” përballë situatës së krijuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)