“Batman” ndërhyn në mbledhjen e Këshillit të Qytetit kundër bashkëpunimit me ICE

Një ngjarje e pazakontë ndodhi gjatë një mbledhjeje të Këshillit të Qytetit të Santa Klara-s, në Kaliforni. Një burrë i veshur si “Batman” mori fjalën për të kërkuar nga autoritetet lokale të ndalonin çdo formë bashkëpunimi me ICE, Agjencinë për Emigracionin dhe Doganat në SHBA.

I veshur me kostumin e personazhit të filmave, ai akuzoi anëtarët e Këshillit për vonesa dhe mungesë veprimi, duke thënë se qeveria federale po tejkalonte autoritetin e saj në kurriz të komuniteteve lokale. Personazhi i veçantë shtoi se fakti që nuk po mbahet një qëndrim i qartë nga qyteti, rrezikonte sigurinë publike dhe qytetarët më të pambrojtur.

Në fjalimin e tij, “Batman” u kërkoi këshilltarëve të angazhoheshin me shkrim se asnjë burim, informacion apo ndihmë operacionale e qytetit nuk do të jepet për ICE, duke theksuar se autoritetet lokale duhet të mbrojnë të gjithë banorët, pavarësisht statusit të tyre ligjor.

Fjalimi i tij u ndërpre nga sinjali që tregon përfundimin e kohës së caktuar për të folur. Ndërsa largohej nga podiumi, folësi i radhës komentoi me humor: “Është e vështirë të flasësh pas ‘Batman’-it,” duke shkaktuar ilaritet në sallë.

Ndodhia u regjistrua nga video zyrtare e komunës së Santa Klara-s dhe nisi të shpërndahet gjerësisht në rrjetet sociale, duke nxitur diskutime jo vetëm mbi mënyrën dhe tonin e ndërhyrjes, por edhe mbi kërkesat që “superheroi” paraqiti.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)