Revoltë e fermerëve në Francë, rrethojnë me traktorë Kullën Eiffel dhe Harkun e Triumfit në Paris

Traktorët e fermerëve hynë në Paris para agimit të sotëm dhe arritën në Kullën Eiffel, duke sjellë në kryeqytet mobilizimin për kërkesat e tyre, i cili ka vazhduar në javët e fundit në Francë.

Sipas një sindikate dhe gazetarëve AFP dhe Reuters që janë në vendngjarje, ata po marshojnë nëpër Paris dhe madje kaluan përgjatë bulevardit Champs-Elysees, në drejtimin nga jugu.

Rreth njëzet fermerë kanë rrethuar Kullën Eiffel, me traktorët e tyre duke i parkuar aty pranë.

Qëllimi i sindikatës është të protestojë kryesisht kundër marrëveshjes së tregtisë së lirë midis BE-së dhe vendeve të Mercosur, por edhe kundër menaxhimit nga shteti të epidemisë së encefalopatisë sfungjerore të gjedhit, e cila në fillim të dhjetorit rriti zemërimin e fermerëve në Francën jugperëndimore.

Që nga dimri i vitit 2024, fermerët kanë bërë thirrje për thjeshtimin e procedurave administrative dhe zbutjen e standardeve, veçanërisht atyre evropiane, të cilat konsiderohen tepër shtrënguese dhe të favorshme për krijimin e konkurrencës së padrejtë.

"Ne do të shkojmë me çdo kusht për të shprehur kërkesat tona", tha për AFP të mërkurën Éloïse Nespoulou, presidente e Koordinimit Bujqësor në rajonin e Oksitanisë dhe udhëheqëse e një procesioni prej 40 traktorësh.

Presidenti kombëtar i sindikatës, Bertrand Vandeau, kishte thënë se donte t’i sillte kërkesat e tij “në mënyrë paqësore” në parlamentin francez dhe në dy vende “simbolike” në Paris, edhe nëse gjysma e anëtarëve të tij do të arrestoheshin.

Mbrëmë, policia kishte ndaluar traktorët të hynin në zona të caktuara të ndjeshme të kryeqytetit, veçanërisht në drejtimin për në pallatin presidencial të Elizesë, pallatin Matignon, ku është selia e kryeministrit, parlamentin, ministritë e Bujqësisë dhe Tranzicionit Ekologjik, dhe madje, në rajonin e Parisit, në tregun qendror të frutave dhe perimeve të Rungis.

Komente (0)