Horror në ajër, dy pasagjerë thyejnë këmbët gjatë turbulencave

Dy persona kanë pësuar fraktura në këmbë gjatë një fluturimi të “British Airways” nga Los Anxhelos drejt Londrës, pas turbulencave të papritura në mes të fluturimit. Ngjarja ndodhi rreth 20 minuta pasi sinjali i rripit të sigurimit ishte fikur, teksa aeroplani po fluturonte mbi Oqeanin Atlantik, në jug të Groenlandës.

Sipas kapitenit të fluturimit, turbulencat zgjatën vetëm 10-15 sekonda dhe u perceptuan si të lehta deri mesatare, por ishin të mjaftueshme për të shkaktuar lëndime serioze. Njëri nga të lënduarit ishte një pasagjer që po kthehej nga tualeti, i cili deklaroi se avioni bëri një “lëvizje të papritur lart dhe anash”, duke i shkaktuar thyerjen e këmbës. Viktima tjetër ishte një anëtare e ekuipazhit, e cila humbi ekuilibrin teksa po përpiqej të ulej për t’u lidhur me rrip sigurimi.

Fatmirësisht, ekuipazhi reagoi menjëherë, ndërsa në bord ndodheshin edhe dy pasagjerë që ishin mjekë dhe ofruan ndihmën e parë. Situata u komplikua më tej kur një pasagjer tjetër humbi ndjenjat, çka bëri që kapiteni të shqyrtonte një ulje emergjente në Kanada ose Islandë. Megjithatë, u vendos që fluturimi të vazhdonte drejt Heathrow.

Avioni Airbus A380 u ul në mënyrë të sigurt në Londër, ku ambulancat prisnin për të transportuar të lënduarit në spital. British Airways theksoi se siguria mbetet prioritet absolut dhe se ekuipazhi është i trajnuar për të përballuar edhe ngjarje të rralla si kjo.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)