Moti i keq në jug të Italisë, kërkohet shpallja e gjendjes së emergjencës në Kalabri, Siçili dhe Sardenjë

Italinë Jugore e ka goditur një valë e re e motit ekstrem prej ciklonit “Harry”. Nga situata e krijuar është vendosur alarmi i të kuq në Siçili, Kalabri dhe Sardenjë. Ministri i Infrastrukturës, Matteo Salvini, ka njoftuar se është kërkuar shpallja e gjendjes së emergjencës për rajonet e prekura.

Gjatë natës, dallgët e forta të detit kanë goditur qytetin e Katanias, ku detritet dhe sasi të mëdha rëre kanë pushtuar rrugët dhe banesat. Dhjetëra familje janë evakuuar për arsye sigurie. Situata mbetet kritike edhe në Ishujt Eolie dhe në zonën e Mesinës, ku përmbytjet kanë shkaktuar dëme të mëdha në porte, rrugë dhe shtëpi.

Lundrimi me çdo lloj anije është pezulluar, ndërsa në Santa Teresa di Riva, bregdeti është shkatërruar për rreth 800 metra nga dallgët e fuqishme. Në Sirakuzë janë regjistruar rrëshqitje dhe shembje dheu, ndërsa cikloni vazhdon të shkaktojë dëme edhe në brigjet e Kalabrisë, veçanërisht në zonat e Rexho Kalabria-s dhe Katancaro-s.

Në Sardenjë, në komunën Sinai pranë Kaljarit, një nënë dhe vajza e saj u shpëtuan nga zjarrfikësit pasi dy përrenj dolën nga shtrati, duke i vënë në rrezik. Kryeministrja Giorgia Meloni deklaroi se qeveria do të mbështesë komunitetet e goditura dhe se zhvillimet e situatës po monitoron nga afër.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)