100 mijë trupa në kufij për ofensivën e re të Putinit, ish-shefi i CIA-s tregon pse nuk do të ketë sukses

Rusia po grumbullon forca dhe pajisje ushtarake për një ofensivë të madhe në Ukrainë, që pritet të nisë në fund të pranverës dhe të arrijë kulmin gjatë verës. Sipas vëzhguesve ushtarakë ukrainas dhe ndërkombëtarë, qëllimi i Moskës është të thyejë rezistencën e Kievit dhe t’i imponojë kushte paqeje deri në fund të verës, në kundërshtim të hapur me deklaratat e Kremlinit për gatishmëri për diplomaci.

Analistët e projektit “Deep State UA” paralajmërojnë se Rusia ka krijuar rezerva strategjike që nga mesi i vitit të kaluar dhe po përgatit një goditje kryesore në lindje, drejt qyteteve kyçe Slovjansk dhe Kramatorsk, me synimin për të futur në betejë vendimtare forcat tokësore të Ukrainës dhe për t’i asgjësuar. Një ofensivë dytësore pritet në jug, drejt Zaporizhjës dhe Orihivit, për të shpërqendruar mbrojtjen ukrainase. Në këtë operacion mund të angazhohen mbi 100 mijë ushtarë rusë.

Edhe Instituti Amerikan për Studimin e Luftës konfirmon lëvizjet e trupave dhe rritjen e rekrutimit, duke theksuar se këto veprime tregojnë përgatitje për përshkallëzim, jo për negociata. Megjithatë, ekspertët dyshojnë në suksesin e planit rus, për shkak të mbrojtjes së fortë ukrainase të bazuar në dronë dhe rënies së ndjeshme të motivimit për rekrutim në Rusi.

Ish-drejtori i CIA-s dhe gjenerali amerikan David Petraeus vlerëson se, megjithë presionin e vazhdueshëm, linjat mbrojtëse ukrainase po rezistojnë prej muajsh dhe do të arrijnë ta ndalin ofensivën e re. Sipas tij, vendosmëria e popullit ukrainas dhe mbështetja perëndimore do të jenë vendimtare.

Ndërkohë, raportet nga terreni flasin për humbje të mëdha ruse, me avancime minimale, ndërsa taktikat e reja me këmbësori të lehtë kanë rezultuar tepër të kushtueshme. Analistët paralajmërojnë se vera pritet të sjellë përleshje të ashpra dhe një fazë kritike të luftës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)