“Koha po mbaron”, Britania, ultimatum Abramovich-it: Dorëzo 2,5 miliardë paundët që shite Chelsea-n

Ish-pronari i Chelsea-s, Roman Abramovich, është paralajmëruar nga autoritetet britanike se “koha po mbaron” për të dorëzuar 2.5 miliardë paundët e përfituara nga shitja e klubit, fonde që synohen për Ukrainën. Paralajmërimi u bë publik nga ministrja e Brendshme, Yvette Cooper, në mes të tensioneve të reja mes Londrës dhe Moskës.

Abramovich, i sanksionuar nga Mbretëria e Bashkuar pas pushtimit rus të Ukrainës, kishte rënë dakord që shuma e mbetur nga shitja e Chelsea-t të përdorej për qëllime humanitare. Megjithatë, fondet vijojnë të mbeten të ngrira në një llogari bankare, pasi nuk është arritur ende një marrëveshje me qeverinë britanike për mekanizmin e transferimit.

Cooper theksoi se qeveria ka ndjekur procedurat ligjore dhe i ka dhënë kohë oligarkut për të përmbushur zotimin, por shtoi se “ora po troket”. Në të kundërt, ministrat kanë paralajmëruar nisjen e veprimeve ligjore për t’ia hequr kontrollin mbi shumën.

Deklaratat vijnë ndërsa aleatët perëndimorë vijojnë presionin ndaj Rusisë, duke lënë të hapur mundësinë e sanksioneve të reja. Ambasada ruse në Londër ka mohuar akuzat e fundit të Perëndimit, duke i cilësuar ato si të pabazuara.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)