Ndryshojnë rregullat për të hyrë në Britani për ata me dy pasaporta

Rregulla të reja dhe më të ashpra për hyrjen në Mbretërinë e Bashkuar hyjnë në fuqi nga 25 shkurti, duke prekur drejtpërdrejt shtetasit me dyshtetësi britanike. Sipas ndryshimeve të reja, të gjithë qytetarët britanikë që mbajnë edhe një pasaportë tjetër nuk do të lejohen më të hyjnë në Britani vetëm me pasaportën e huaj.

Nga nesër, për të udhëtuar drejt Mbretërisë së Bashkuar, ata duhet të paraqesin një pasaportë të vlefshme britanike ose irlandeze. Në të kundërt, do t’u duhet të aplikojnë për një “Certificate of Entitlement”, dokument që kushton 589 paund dhe kërkon disa javë për t’u përpunuar. Alternativë mbetet edhe aplikimi për pasaportë britanike, e cila në Australi kushton rreth 190 dollarë australianë për të rriturit.

Ndryshimi ka shkaktuar konfuzion të madh veçanërisht në Australi, ku jetojnë rreth 1.2 milionë shtetas britanikë. Shumë australianë me prindër të lindur në Britani mund të jenë automatikisht shtetas britanikë, pa qenë të vetëdijshëm për këtë fakt. Kreu i Shoqatës Australiane të Industrisë së Udhëtimeve, Dean Long, deklaroi se shumë persona po e kuptojnë vetëm ditët e fundit para nisjes se duhet të pajisen me dokumentacion shtesë.

Sipas Ministrisë së Brendshme britanike, linjat ajrore mund të pranojnë pasaporta britanike të skaduara, por vendimi mbetet në diskrecionin e tyre dhe nuk ka garanci ligjore për lejimin e udhëtimit. Opozita liberaldemokrate e ka kritikuar qeverinë për mungesë planifikimi dhe komunikimi, duke kërkuar një periudhë tranzitore për të shmangur situata ku qytetarët mbeten të bllokuar jashtë vendit për shkak të kostove dhe procedurave të reja.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)