“12 vjet vetëm drejtësi, polici dhe burgje”, Tafaj: Arsimi nuk ka qenë prioritet, kjo është “Thembra e Akilit”

Ish-ministri i Arsimit, Myqerem Tafaj, i ftuar në “Pë(r)shtjellim” nga Ilir Kalemaj në Newsmax Balkans Albania, deklaroi se problemi kryesor i arsimit parauniversitar në Shqipëri është mungesa e prioritetit nga ana e qeverisë ndër vite.

Duke iu referuar edhe rezultateve të dobëta në testimet ndërkombëtare si PISA, Tafaj theksoi se kriza është pasojë e drejtpërdrejtë e mungesës së investimit dhe vëmendjes institucionale.

Sipas tij, “Thembra e Akilit është se arsimi nuk është prioritet në Shqipëri. Po të hidhni një vështrim që nga viti 2013, çfarë ka ndodhur në Shqipëri? Në 12 vjet, Shqipëria ka pasur prioritete të tjera.”

Ai u shpreh kritik ndaj fokusit të politikave publike, duke shtuar: “Për të konsoliduar një demokraci duhet të konsolidosh drejtësinë. Megjithatë, unë nuk e kuptoj sesi një vend të merret në 12 vjet vetëm me drejtësinë, policinë dhe burgjet. Aty ka qenë i gjithë fokusi”.

Tafaj theksoi se prioriteti matet me investime konkrete. “Sot Shqipëria ka një buxhet të përgjithshëm rreth 9 miliardë euro. Që Shqipëria të thoshte: unë e kam prioritet arsimin, do të duhej të ishte të paktën 900 milionë euro, 10 për qind të shpenzimeve publike,” u shpreh ai në “Pë(r)shtjellim”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)