Specia që cilësohej e zhdukur prej 11 milionë vitesh, shitej si ushqim në tregjet e Laosit

Një zbulim i jashtëzakonshëm shkencor ka ardhur nga tregjet e Laosit, ku një kafshë që shitej si ushqim, në fakt rezultoi të ishte një specie që mendohej e zhdukur prej rreth 11 milionë vitesh. Bëhet fjalë për “Laonastes aenigmamus”, i njohur si miu i shkëmbinjve, i cili u vu re për herë të parë në vitin 1996 nga biologu Robert Timmins në një treg në qytetin Thakhek.

Fillimisht u mendua se ishte një specie e re, e panjohur për shkencën. Por, pas studimeve të mëtejshme, duke përfshirë edhe analiza në Muzeun Natyror të Historisë, shkencëtarët zbuluan se ky brejtës kishte karakteristika shumë të ndryshme nga të gjithë të tjerët. Krahasimet me fosile të vjetra nga Azia treguan se ai i përkiste familjes Diatomyidae, e cila besohej se ishte zhdukur miliona vite më parë.

Në vend që të ishte një specie e re, ai rezultoi të ishte i vetmi përfaqësues i mbijetuar i një linje shumë të lashtë evolucionare. Ky rast është një shembull i qartë i “Efektit Lazar”, që përkufizon rikthimin e një specieje të konsideruar të zhdukur pas një periudhe shumë të gjatë mungese në të dhënat fosile.

Zbulimi u publikua në vitin 2006 në revistën “Science” dhe u konsiderua një nga rastet më të rralla të këtij fenomeni tek gjitarët. Laonastes aenigmamus ka një pamje të veçantë, mes një miu dhe një ketri dhe lëviz në mënyrë të çuditshme, duke u tundur si një rosë. Ai jeton kryesisht në zona shkëmbore dhe preferon të lëvizë mes gurëve, në vend që të ngjitet në pemë. Zbulimi i tij ishte një surprizë e madhe, duke konfirmuar se në vendet më të pazakonta mund të fshihen sekrete që ndryshojnë historinë e evolucionit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)