Krim i rëndë në Itali, burri vret gruan e më pas vetëvritet

Një ngjarje e rëndë ka ndodhur në Castel Maggiore, në provincën e Bolonjës, ku një çift bashkëshortësh janë gjetur të pajetë brenda banesës së tyre, në atë që hetuesit dyshojnë si një rast vrasje dhe vetëvrasje.

Sipas hetimeve paraprake të autoriteteve italiane, një burrë 73-vjeçar dyshohet se ka vrarë bashkëshorten e tij 63-vjeçare dhe më pas i ka dhënë fund jetës duke u vetëvarur në të njëjtin apartament. Megjithatë, karabinierët theksojnë se hetimet janë ende në vijim dhe pritet verifikimi i plotë i rrethanave.

Alarmi është dhënë nga djali i çiftit, i cili kishte humbur kontaktin me prindërit që nga mbrëmja e 20 prillit. Pas disa përpjekjeve të dështuara për t’i kontaktuar, ai është paraqitur në banesë ku ka bërë edhe zbulimin tragjik.

Në vendngjarje kanë mbërritur menjëherë forcat e policisë, njësitë hetimore shkencore dhe prokuroria. Autoritetet kanë urdhëruar kryerjen e autopsisë mbi të dy trupat për të sqaruar saktësisht shkaqet e vdekjes.

Sipas burimeve hetimore, dyshohet se burri mund ta ketë vrarë bashkëshorten fillimisht, ndoshta duke e mbytur, përpara se të vetëvritej disa orë më vonë. Çifti, sipas informacioneve paraprake, ndodhej prej kohësh në krizë familjare dhe megjithëse jetonin në të njëjtën banesë, konsideroheshin praktikisht të ndarë.

Hetimet po vijojnë për të hedhur dritë të plotë mbi dinamikën e ngjarjes dhe motivet e mundshme që çuan në këtë tragjedi familjare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)