“Humbi jetën jashtë vendit”, Mossad flet për agjentin që luftonte Iranin

Shërbimi sekret i Izraelit, Mossad për herë të parë ka pranuar se një prej agjentëve të saj ka humbur jetën gjatë një misioni jashtë vendit, ndërsa po kontribuonte në përgatitjen e një operacioni të rëndësishëm kundër Iranit.

Lajmi u bë publik nga drejtori i agjencisë, David Barnea, gjatë një ceremonie përkujtimore me rastin e Yom Hazikaron. Ai vlerësoi rolin e agjentit, i identifikuar vetëm me inicialin “M.”, duke theksuar se aktiviteti i tij kishte ndikuar ndjeshëm në suksesin e operacionit të njohur si “Ulërima e Luanit”.

Sipas mediave izraelite, agjenti dyshohet të jetë Erez Shimoni, i cili humbi jetën në maj të vitit 2023 në një aksident në Lago Maggiore, në Itali, kur një varkë turistike u përmbys. Në bord ndodheshin gjithsej 24 persona, përfshirë edhe pjesëtarë të shërbimeve inteligjente italiane.

Ngjarja shkaktoi katër viktima, mes tyre dy shtetas italianë të lidhur me inteligjencën dhe bashkëshortja ruse e kapitenit të anijes. Shumica e të mbijetuarve arritën të shpëtonin duke notuar drejt bregut ose u ndihmuan nga mjete të tjera lundruese.

Raportimet sugjerojnë se një pjesë e madhe e personave në bord ishin agjentë aktivë ose ish-agjentë, çka ka ngritur dyshime mbi natyrën e vërtetë të udhëtimit. Pas incidentit, shumë prej tyre u larguan shpejt nga strukturat shëndetësore dhe hotelet, duke shmangur vëmendjen publike.

Ndërkohë, drejtori Barnea ka theksuar se Mossad do të vijojë operacionet e fshehta kundër Iranit, edhe pas zhvillimeve të fundit në rajon. Sipas tij, shtrirja e inteligjencës izraelite brenda territorit iranian mbetet e gjerë dhe aktive.

Autoritetet izraelite nuk kanë dhënë detaje të mëtejshme për shkak të ndjeshmërisë së operacioneve, ndërsa rasti rikthen në vëmendje rolin e shërbimeve sekrete në përplasjet gjeopolitike në Lindjen e Mesme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)