Irani mbyll ngushticën e Hormuzit për stërvitje ushtarake

Irani ka mbyllur përkohësisht Ngushticën e Hormuzit për shkak të një stërvitjeje ushtarake, në një lëvizje që shihet si paralajmërim ndaj Shteteve të Bashkuara mes tensioneve në rritje. Ngushtica, përmes së cilës kalon rreth 20% e naftës botërore, konsiderohet një nga pikat më të ndjeshme të tregtisë globale të energjisë.

Mediat iraniane raportuan për teste raketore dhe qitje detare në këtë korridor jetik që lidh Gjirin Persik me Gjirin e Omanit. Sipas autoriteteve në Teheran, mbyllja ishte e përkohshme dhe u ndërmor për arsye sigurie detare. Megjithatë, ky veprim përbën një sinjal të fortë për pasojat që mund të ketë ekonomia globale nëse përshkallëzohet konflikti me SHBA-në.

Komanda Qendrore e Ushtrisë Amerikane, nuk reagoi menjëherë, por më herët kishte paralajmëruar Iranin kundër sjelljeve “të pasigurta dhe joprofesionale” pranë forcave amerikane apo anijeve tregtare. Në rajon ndodhet aeroplanmbajtësja USS Abraham Lincoln, ndërsa presidenti Donald Trump ka njoftuar edhe dërgimin e USS Gerald R Ford në Lindjen e Mesme.

Tensionet janë rritur pas kërcënimeve të Trump për sulme ushtarake ndaj Iranit dhe përpjekjeve për ta detyruar Teheranin të arrijë një marrëveshje për programin bërthamor. Të martën, palët zhvilluan bisedime indirekte në Gjenevë, pa arritur një marrëveshje të plotë.

Udhëheqësi suprem iranian, Ali Khamenei, paralajmëroi se edhe “ushtria më e fortë në botë” mund të goditet rëndë, duke nënvizuar kapacitetet raketore të Iranit. Ndërkohë, tregjet globale mbeten të ndjeshme ndaj çdo zhvillimi në këtë nyje strategjike, ku shumica e eksporteve të naftës nga vendet e Gjirit kalojnë drejt tregjeve aziatike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)