Kina, më pak fëmijë, më shumë robotë! Pekini vë bast te inteligjenca artificiale për të sfiduar rënien e popullsisë

Masat për të rritur shkallën e lindjeve kanë pasur efekt të kufizuar dhe Kina po ndërmerr veprime. Pas dekadash politikash për kontrollin e lindjeve, sot problemi është i kundërt, nuk ka mjaftueshëm fëmijë.

Shkalla e lindjeve është në nivelet më të ulëta historike dhe popullsia po bie për të katërtin vit radhazi. Një shoqëri që po plaket me shpejtësi po ushtron presion mbi pensionet, kujdesin shëndetësor dhe rritjen ekonomike, duke krijuar një ekuilibër gjithnjë e më të brishtë.

Kështu, krahas stimujve socialë, Pekini po përqendrohet në një strategji tjetër që përfshin robotët, automatizimin dhe inteligjencën artificiale. Qëllimi është të ruhet produktivitet i lartë edhe me një fuqi punëtore më të vogël, duke transformuar fabrikat në makina kuazi-autonome dhe duke zhvilluar robotë humanoide për ndihmë, logjistikë dhe kujdes për të moshuarit.

Sipas të dhënave zyrtare, në fund të vitit 2025, popullsia e Kinës ishte afërsisht 1.404 miliardë banorë, një rënie prej 3.39 milionë banorësh nga viti i kaluar. Lindjet e reja arritën në vetëm 7.92 milionë, afërsisht 17% më pak se në vitin 2024, me një shkallë fertiliteti prej 0.96 fëmijësh për grua, shumë nën shkallën e zëvendësimit prej 2.1.

Pjesa e qytetarëve mbi 60 vjeç ka arritur në 23%, ose mbi 323 milionë njerëz. Deri në vitin 2035, numri i personave mbi 60 vjeç mund të kalojë 400 milionë, duke rritur presionin mbi mirëqenien dhe sistemin e pensioneve.

Pekini tashmë e ka rritur moshën e daljes në pension dhe vazhdon të kërkojë mënyra për të stimuluar shkallën e lindjeve, por tendenca duket e vështirë për t'u ndryshuar.

Teknologjia duket zgjidhja më e menjëhershme. Kina është tregu më i madh global për robotët industrialë, dhe fabrikat e errëta  që funksionojnë pa operatorë njerëzorë dhe lejojnë prodhim të lartë.

Startup-et dhe qendrat kërkimore po përqendrohen në robotët humanoide të aftë të punojnë së bashku ose të zëvendësojnë njerëzit në sektorë kyç, nga prodhimi deri te kujdesi për të moshuarit.

Por tranzicioni nuk është pa dhimbje. Automatizimi mund të shkaktojë papunësi në sektorë të caktuar dhe të theksojë pabarazinë nëse nuk shoqërohet me trajnim, rikualifikim dhe mbrojtje sociale. Sfida e Kinës nuk është vetëm teknologjike: është sociale, kulturore dhe ekonomike. Adresimi i rënies demografike do të kërkojë një përzierje inovacioni, reformash dhe politikash familjare të afta për të krijuar kushte të favorshme për brezat e rinj.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)