I dha ëmbëlsira kolegëve për ditëlindje, e shkarkojnë nga puna, gjykata detyron kompaninë t’i paguajë 100 mijë euro

Një punonjës supermarketi në Spanjë, me mbi 30 vite përvojë pune, është shpallur fitues në betejën ligjore ndaj kompanisë së tij, pasi drejtësia ka vendosur se largimi i tij nga puna ishte i padrejtë. Gjykata ka urdhëruar kompaninë që ose ta rikthejë punonjësin në vendin e punës, ose t’i paguajë një dëmshpërblim në vlerën 105.716,09 euro.

Ngjarja ka ndodhur më 4 tetor 2023, kur punonjësi, me rastin e ditëlindjes së tij, u ofroi kolegëve disa ëmbëlsira të marra nga vetë supermarketi. Produktet u konsumuan para hapjes së dyqanit dhe u hoqën para ardhjes së klientëve. Gjatë pagesës, për shkak të një gabimi në regjistrim dhe arkëtim, u pagua vetëm një pjesë e shumës, konkretisht 10,23 euro. Disa ditë më pas, gabimi u korrigjua dhe u pagua diferenca prej 58,59 euro.

Megjithatë, një muaj më vonë, kompania e pushoi nga puna për shkelje të rregullores së brendshme. Punonjësi e çoi çështjen në gjykatë dhe fitoi. Si Gjykata e Shkallës së Parë në Vigo, ashtu edhe Gjykata e Lartë e Galicisë, vlerësuan se nuk kishte qëllim mashtrimi apo dëm ekonomik për kompaninë.

Gjykata theksoi se masa e shkarkimit ishte e tepruar, duke marrë parasysh edhe faktin se raste të ngjashme ishin toleruar më parë, pa masa disiplinore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)