VIDEO/ Çmenduri! 26 milionë dollarë mbi tavolina: Merrni sa të mundni

Një kompani në Kinë ka tërhequr vëmendjen botërore pasi shpërndau rreth 26 milionë dollarë në para “cash” gjatë festës së fundvitit, duke lejuar punonjësit të merrnin në shtëpi aq sa mund të mbanin me duar. Bëhet fjalë për firmën Henan Kuangshan Crane Co. Ltd., e cila organizoi eventin më 13 shkurt me rreth 7 mijë pjesëmarrës.

Sipas raportimeve të Chosun Daily, shuma e madhe e parave u vendos mbi 800 tavolina banketi nën drita shumëngjyrëshe, ndërsa punonjësit, të veshur me kostume, zgjidhnin tufat e kartëmonedhave. Një prej tyre arriti të marrë rreth 13 mijë dollarë.

Themeluesi dhe pronari kryesor i kompanisë, Cui Peijun, i cili zotëron 98.88% të aksioneve, shpjegoi se preferon shpërndarjen fizike të bonusit në vend të transfertave bankare. “Disa pyesin pse nuk ua kalojmë paratë në llogari, por në atë mënyrë janë vetëm numra,” mësohet të ketë thënë ai gjatë festës. Ai shtoi se në vend të dhuratave tradicionale si bizhuteri apo pajisje shtëpiake, këtë vit vendosën të jepnin para “cash” për të gjithë.

Kompania, e themeluar në vitin 2002 dhe që operon në mbi 130 vende, ka reputacion për bujarinë ndaj stafit. Në vitin 2024 ajo raportoi fitim neto rreth 38 milionë dollarë, nga të cilat afërsisht 24 milionë iu shpërndanë punonjësve. Po ashtu, për Ditën Ndërkombëtare të Gruas vitin e kaluar, firma ndau rreth 230 mijë dollarë bonuse për afro 2 mijë punonjëse.

Cui Peijun ka deklaruar se motivimi i tij lidhet me vështirësitë ekonomike të të rinjve, si kreditë për shtëpi dhe makina, duke theksuar se çdo ndihmë financiare është e vlefshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)