Tërhiqet Vjosa, Rama: Nis procesi i verifikimit të dëmeve

Ndërprerja e reshjeve të shiut ka sjellë një përmirësim të dukshëm të situatës së krijuar nga përmbytjet në disa zona, sidomos në Fier, ku dalja nga shtrati e lumit Vjosa detyroi evakuimin e dhjetëra familjeve.

Aktualisht, niveli i Vjosës ka arritur në 8.4 m nga 9.2 që ishte në orët e pasdites së të enjtës. Megjithatë, ka prezencë uji në shumë banesa dhe toka bujqësore, çka ka detyruar autoritetet që ta mbajnë situatën në kontroll të vazhdueshëm.

Për situatën ka reaguar në rrjetet sociale dhe kryeministri Rama i cili mes të tjerash shkruan se tashmë ka nisur dhe procesi i verifikimit të dëmeve në terren, teksa shtoi se strukturat mbeten në gatishmëri.

“Niveli i ujit në lumin Vjosë ka rënë në mënyrë të ndjeshme. Ka filluar procesi i verifikimit të dëmeve në të gjithë zonën, ndërsa strukturat përkatëse mbeten në gatishmëri dhe në shërbim të plotë të të gjithë banorëve për çdo nevojë apo emergjencë”, shkruan Edi Rama.

Moti i keq prej disa ditësh ka përfshirë zona të ndryshme të vendit duke shkaktuar një humbje jete dhe dëme të mëdha materiale.

Në veri dhe juglindje, prej së enjtes, reshjet e shiut ja lanë vendin borë, të cilat gjithashtu shkaktuan problematika në qarkullimin e mjeteve dhe furnizimin me energji elektrike në disa zona.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)