Moti i paqëndrueshëm në vend, shi dhe borë në zonat malore

Gjatë ditës së sotme, vendi ynë do të vijojë të ndikohet nga kushte atmosferike të paqëndrueshme. Moti do të karakterizohet nga vranësira mesatare deri të dendura, të alternuara herë pas here me intervale kthjellimesh.

Reshjet e shiut do të jenë të herëpashershme dhe me intensitet të ulët. Ato do të nisin që në orët e para të ditës në jug të territorit dhe më pas do të shtrihen gradualisht në pjesën më të madhe të vendit. Në zona të izoluara, reshjet mund të shoqërohen me shtrëngata afatshkurtra, kryesisht gjatë mesditës dhe orëve të pasdites.

Më vonë, reshjet e dobëta do të mbeten të përqendruara kryesisht në veri dhe pjesërisht në zonat malore të juglindjes, ndërsa gjatë orëve të mbrëmjes pritet ndërprerja e tyre në të gjithë territorin.

Në zonat malore mbi 900–1000 metra, kryesisht në verilindje dhe juglindje, parashikohen reshje bore me intensitet të ulët dhe lokalisht deri mesatar, më të theksuara në juglindje.

Era do të fryjë nga drejtimi verilindje–lindje me shpejtësi mesatare rreth 8 m/s, ndërsa përgjatë vijës bregdetare dhe në zonat luginore pritet të arrijë deri në 17 m/s.

Deti do të paraqitet me valëzim të forcës 2–3 ballë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)