Mbështetësit e Hezbollahut protestojnë në Liban: Jemi e vetmja rezistencë

Protesta të mëdha janë zhvilluar në qendër të Bejrutit, pranë zyrës së kryeministrit, ku mbështetës të Hezbollahut kanë kundërshtuar mundësinë e hapjes së bisedimeve të drejtpërdrejta me Izrael.

Sipas zhvillimeve të raportuara, qeveria libaneze ka propozuar nisjen e një dialogu si pjesë e përpjekjeve për t’i dhënë fund luftës dhe për të arritur një armëpushim të qëndrueshëm.

Megjithatë, kjo ide është pritur me kundërshtime të forta nga mbështetësit e Hezbollah-ut, të cilët e konsiderojnë grupin si forcën kryesore të “rezistencës” ndaj Izraelit.

Tubuesit mbanin flamuj të Hezbollahut,  Iranit dhe fotografi të ish-liderit Hassan Nasrallah, duke shprehur qëndrimin e tyre kundër çdo procesi negociues me Izraelin.

Nga ana tjetër, Izraeli e konsideron Hezbollahun një kërcënim serioz dhe ka deklaruar se synon krijimin e një zone sigurie përgjatë kufirit verior për të mbrojtur komunitetet e tij.

Në Liban ekzistojnë frikëra se kjo situatë mund të çojë në përshkallëzim të mëtejshëm të konfliktit dhe madje në kontroll territorial në disa zona kufitare.

Brenda vendit, kritikët e Hezbollahut kërkojnë çarmatimin e grupit dhe mbështesin nisjen e negociatave direkte me Izraelin, duke e akuzuar atë për përfshirjen e Libanit në konflikte të përsëritura.

Qeveria libaneze, ndërkohë, ka theksuar nevojën për një armëpushim paraprak para çdo procesi dialogu, ndërsa Izraeli ka bërë të ditur se operacionet ushtarake do të vazhdojnë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)