Teknologjia 5G dhe AI ndryshojnë mënyrën si tifozët ndjekin ndeshjet në stadium

Një teknologji e re, e përshkruar si “e para e këtij lloji në Mbretërinë e Bashkuar”, pritet të revolucionarizojë përvojën e tifozëve gjatë ndeshjeve të futbollit, sipas studiuesve.

Teknologjia, e testuar me sukses në një stadium në Milton Keynes, garanton që tifozët nuk do të kenë më probleme me rrjetin celular dhe nuk do të humbasin momentet kyçe të ndeshjes.

Ky inovacion, që bashkon inteligjencën artificiale dhe rrjetin 5G, është zhvilluar në bashkëpunim midis Universitetit të Bristol-it, ekspertëve të AI-së nga Madevo dhe specialistëve të rrjeteve nga Weaver Labs.

Profesoresha Dimitra Simeonidou nga Universiteti i Bristol-it tha: Jemi të emocionuar të shohim sesi këto teknologji mund të transformojnë thellësisht mënyrën si përjetohet një eveniment live.

Për vite me radhë, tifozët janë përballur me vështirësi për të pasur sinjal të mirë në stadium, për shkak të mijëra përdoruesve që përpiqen të lidhen njëkohësisht. Teknologjia e re ofron nivele të paprecedenta interaktiviteti dhe lidhjeje për fansat.

Gjatë testimeve, tifozët arritën të shikonin katër transmetime video cilësore live direkt në pajisjet e tyre mobile, si dhe të merrnin statistika lojtarësh dhe pamje ekskluzive “pas skenave”.

Sipas Universitetit të Bristol-it, kjo teknologji mund të transformojë stadiumet tradicionale në ambiente inteligjente, duke i dhënë klubeve një avantazh të madh në menaxhimin e tifozëve dhe përvojës së tyre.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)