Kina gati të “zhysë” milionerët në fund të oqeanit

Një projekt ambicioz nga Kina synon të revolucionarizojë turizmin luksoz, duke ofruar zhytje ekstreme në thellësi deri në 1 mijë metra nën sipërfaqen e oqeanit, aty ku drita e diellit nuk depërton më.

Nisma drejtohet nga Qendra Kineze e Kërkimit Shkencor për Anijet, i cili ka përfunduar projektimin e një nëndetëseje turistike të aftë për të transportuar deri në 4 persona për çdo zhytje. Sipas planit, prototipi pritet të jetë gati në fund të vitit 2026, ndërsa operimi komercial synohet të nisë në vitin 2030.

Ky treg deri më tani është dominuar nga kompani si Triton Submarines dhe U-Boat Worx, të cilat ofrojnë eksperienca të ngjashme, por projekti kinez synon të shkojë më thellë dhe më tej në luks.

Çmimet pritet të jenë të larta: një zhytje e zakonshme në thellësi të vogla kushton rreth 140 euro, ndërsa aventurat deri në 1 mijë metra mund të arrijnë në mijëra euro për person. Projekti synon një target të qartë: mbi 500 mijë individë me pasuri të mëdha që kërkojnë eksperienca unike, nga udhëtimet hapësinore te jahtet luksoze.

Megjithatë, sfidat teknike janë të mëdha. Në këto thellësi, presioni është deri në 100 herë më i lartë se në sipërfaqe, temperatura bie në rreth 4 gradë Celsius dhe mungon plotësisht drita natyrore. Për këtë arsye, inxhinierët kanë zhvilluar një strukturë të fortë me pamje panoramike 360 gradë, që reziston ndaj kushteve ekstreme dhe garanton siguri për pasagjerët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)