Nëndetësja bën zbulimin e rrallë nën akullin e Antarktidës, por zhduket në mënyrë misterioze

Një nëndetëse autonome suedeze ka bërë një zbulim të jashtëzakonshëm nën akullin e Antarktidës përpara se të zhdukej pa asnjë shpjegim, duke lënë pas jo vetëm të dhëna shkencore të vlefshme, por edhe shumë pikëpyetje. Bëhet fjalë për nëndetësen pa ekuipazh “Ran”, e cila në vitin 2022 u përdor nga Universiteti i Goteborgut për të studiuar platformën e akullit Dotson.

Misioni i “Ran” zgjati 27 ditë, gjatë të cilave ajo lundroi nën akull me qëllim të kuptonte pse ana lindore e platformës po shkrihej më ngadalë, ndërsa ana perëndimore po humbiste akull me ritme shumë më të shpejta. Gjatë këtij operacioni, nëndetësja arriti të hartëzojë rreth 139 kilometra katrorë nën akull, duke zbuluar struktura të pazakonta si pllaja të sheshta, gropa dhe shkallë në formë tarracash, të krijuara nga shkrirja e akullit nga poshtë.

Të dhënat treguan se shkrirja në bazë po përshpejtohej nga uji i ngrohtë i thellësive, një rrymë e kripur që vjen nga Oqeani Jugor dhe gërryen platformat e akullit nga poshtë. Sipas matjeve satelitore, disa kanale shkrirjeje po humbasin deri në 12 metra akull në vit, duke kontribuar drejtpërdrejt në rritjen e nivelit të detit.

Ran regjistroi gjithashtu çarje të thella që përshkojnë gjithë trashësinë e akullit, disa prej të cilave janë të hapura që nga vitet ’90 dhe janë zgjeruar me kalimin e kohës nga uji i ngrohtë. Këto çarje funksionojnë si “kanale të fshehta” që përshpejtojnë shkrirjen e akullit, një element që shpesh nuk merret parasysh në modelet kompjuterike klimatike.

Megjithatë, gjatë një dite të misionit, nëndetësja pushoi papritur së dërguari sinjale. Asnjë alarm, asnjë mesazh, “Ran” thjesht u zhduk, rreth 16 kilometra nën akull. Pavarësisht humbjes, të dhënat e dërguara më herët ofrojnë një pamje të rrallë mbi mekanizmat e fshehtë të shkrirjes së Antarktidës dhe nënvizojnë sa shumë mbetet ende për t’u zbuluar në këtë kontinent ekstrem.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)