Pse celularët dhe kompjuterët do të shtrenjtohen në 2026-tën?

Çmimet e shumë pajisjeve teknologjike pritet të rriten gjatë vitit 2026, për shkak të shtrenjtimit të RAM-it, i cili që nga tetori 2025 është rritur nga 2 deri në 5 herë. Shkaku kryesor është rritja e jashtëzakonshme e kërkesës nga inteligjenca artificiale dhe qendrat e të dhënave cloud, që kanë nevojë për sasi të mëdha memorieje, duke krijuar mungesë mes ofertës dhe kërkesës.

Sipas BBC, prodhuesit po përballen me kosto gjithnjë e më të larta, të cilat nuk mund t’i përthithin më, ndaj pritet t’i kalojnë te konsumatorët. Në disa raste, memoria tashmë përbën deri në 30-40% të kostos totale të një kompjuteri, nga 15-20% që ishte më parë.

Ekspertët paralajmërojnë se presioni mbi çmimet do të vazhdojë të paktën deri në vitin 2027. Laptopët mund të kenë rritje kostoje deri në 40-50 dollarë, ndërsa telefonat inteligjentë rreth 30 dollarë, rritje që ka gjasa të reflektohet drejtpërdrejt në çmimin final.

Si pasojë, konsumatorët do të duhet të zgjedhin mes pagesës së më shumë parave për të njëjtën performancë ose blerjes së pajisjeve më pak të fuqishme, ndërsa tregu i RAM-it po zhvendoset gjithnjë e më shumë drejt nevojave të inteligjencës artificiale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)