A mund të ndihmojë inteligjenca artificiale në parandalimin e përmbytjeve?

Inteligjenca artificiale po bëhet gjithnjë e më e pranishme në jetën e përditshme, nga rekrutimi dhe personalizimi i rrjeteve sociale, deri te përparimet mjekësore. Tani, ajo po testohet edhe në fushën e planifikimit urban. Këshilli i Qarkut Northumberland në Angli ka nisur një projekt pilot për të vlerësuar se si AI mund të ndihmojë në marrjen e vendimeve “më të shpejta dhe më të mira” lidhur me rrezikun nga përmbytjet në aplikimet e ndërtimit.

Gjatë këtij viti, ndërsa autoritetet do të vazhdojnë të shqyrtojnë aplikimet si zakonisht, inteligjenca artificiale do të përdoret paralelisht për të parë nëse ajo identifikon probleme më shpejt ose ndihmon në thjeshtimin e hartimit të aplikimeve. Autoritetet theksojnë se projekti është “shumë emocionues”, por sqarojnë se çdo vendim do të mbetet nën mbikëqyrjen e ekspertëve.

Zhvilluesit që kërkojnë leje ndërtimi duhet të dorëzojnë një aplikim që përfshin vlerësimin e rrezikut nga përmbytjet. Këto dokumente shqyrtohen nga oficerët për elemente si rreziku nga ujërat sipërfaqësore, një proces që shpesh është kompleks dhe kërkon shumë kohë. Nick Ëatson, menaxher për rrezikun nga përmbytjet dhe erozioni bregdetar, tha se këshilli shqyrton mijëra aplikime çdo vit dhe se AI mund të ndihmojë duke nxjerrë informacionet kyçe nga dokumentet dhe duke i krahasuar me politikat e shumta të planifikimit për të sinjalizuar probleme të mundshme.

Sipas tij, inteligjenca artificiale nuk do të marrë vendime, por do t’i lehtësojë ndjeshëm punën ekipit. Northumberland konsiderohet një zonë e përshtatshme për këtë projekt, pasi është në pararojë të zhvillimeve të AI, përfshirë ndërtimin e një qendre të madhe të të dhënave dhe projekte për parashikimin e përmbytjeve të shpejta.

Projekti pilot pritet të përfundojë në shtator, ndërsa rezultatet do të publikohen deri në fund të vitit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)