Kryeministri Britanik reagon për situatën në Venezuelë: Mbështesim një tranzicion paqësor drejt demokracisë

Kryeministri i Mbretërisë së Bashkuar, Keir Starmer, ka reaguar këtë të hënë për zhvillimet e fundit në Venezuelë, duke theksuar se Londra zyrtare vazhdon të mbështesë  një zgjidhje paqësore dhe demokratike për krizën politike në këtë vend të Amerikës Latine.

Duke folur përpara gazetarëve, Starmer u shpreh se situata në Venezuelë mbetet tejet delikate dhe kërkon qasje të matur nga komuniteti ndërkombëtar. Ai rikujtoi se Mbretëria e Bashkuar, prej vitesh, ka mbajtur qëndrimin se udhëheqja aktuale e vendit nuk gëzon legjitimitet të plotë dhe se rruga e vetme e qëndrueshme përpara është një tranzicion i rregullt drejt demokracisë.

“Kemi mbështetur prej kohësh një tranzicion paqësor drejt demokracisë, pasi presidenti aktual është i paligjshëm”, deklaroi Starmer, duke nënvizuar se respektimi i vullnetit të qytetarëve dhe standardeve demokratike është thelbësor për stabilitetin afatgjatë të vendit.

Kreu i qeverisë britanike theksoi gjithashtu se e drejta ndërkombëtare duhet të shërbejë si “spirancë” për të ardhmen e Venezuelës, duke shtuar se çdo veprim i ndërmarrë nga aktorë ndërkombëtarë duhet të jetë i justifikuar dhe i përputhshëm me normat ligjore globale. Në këtë kontekst, ai vuri në dukje se është përgjegjësi e Shteteve të Bashkuara të shpjegojnë arsyet dhe bazën ligjore të veprimeve që kanë ndërmarrë.

Starmer e përshkroi krizën si komplekse dhe me shumë faktorë, por theksoi se prioriteti kryesor duhet të mbetet ruajtja e stabilitetit dhe shmangia e përshkallëzimit të mëtejshëm. “Gjëja më e rëndësishme është stabiliteti dhe ai tranzicion paqësor drejt demokracisë”, tha ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)