Ish-ushtarak, hebre ortodoks: Kush është gjyqtari 92-vjeçar, që do të “marrë në dorë” Maduron

Quhet Alvin Hellerstein, është 92 vjeç dhe do të jetë gjyqtari që do të merret me procesin gjyqësor ndaj Nicolás Maduro-s. Ish-presidenti i Venezuelës, i kapur gjatë një operacioni të forcave amerikane, do të gjykohet në New York për akuza që përfshijnë trafik droge, korrupsion qeveritar dhe krime të lidhura me terrorizmin.

Alvin Hellerstein ka lindur në New York City më 28 dhjetor 1933. Ai ka studiuar në Bronx High School of Science, ku u diplomua në vitin 1950, për të vijuar më pas studimet në Columbia College, ku mori një diplomë në Arte. Më pas përfundoi studimet juridike duke marrë titullin Juris Doctor.

Në vitet 1957–1960, Hellerstein shërbeu në Ushtrinë e Shteteve të Bashkuara me gradën toger i parë. Pas përfundimit të shërbimit ushtarak, ai ushtroi profesionin e avokatit përpara se të hynte në sistemin gjyqësor.

Hellerstein u emërua gjyqtar federal në vitin 1998 nga presidenti amerikan i asaj kohe, Bill Clinton. Gjatë karrierës së tij si magjistrat, ai është marrë me çështje të profilit të lartë, veçanërisht në fushën e terrorizmit.

Mes proceseve më të njohura që ka drejtuar janë ato për dëmshpërblimet pas atentateve të 11 shtatorit 2001, çështja për abuzime seksuale ndaj producentit të famshëm Harvey Weinstein, si dhe procesi ndaj ish-avokatit të Donald Trump, Michael Cohen.

Alvin Hellerstein është hebre ortodoks dhe orientimi i tij fetar është i njohur si në qarqet ligjore në New York ashtu edhe në komunitetin hebre, ku ka mbajtur role drejtuese. Ky fakt ka ngjallur vëmendje, duke qenë se Maduro gjatë viteve të qeverisjes së tij ka përdorur shpesh një retorikë anti-izraelite dhe ka forcuar marrëdhëniet me Iranin.

Sipas disa avokatëve që kanë punuar me Hellerstein, ai përshkruhet si “i ashpër, metodik dhe i mprehtë, por në të njëjtën kohë i palëkundur në paanshmërinë e tij”, një profil që pritet të ketë rol kyç në një nga proceset më të bujshme ndërkombëtare të momentit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)