Marrëveshja e Luftës së Ftohtë i “ka dhënë” Trump atë që kërkon nga Groenlanda

Një marrëveshje pak e njohur, e nënshkruar gjatë Luftës së Ftohtë, tregon se Shtetet e Bashkuara gëzojnë tashmë akses të gjerë ushtarak në Groenlandë. Sipas mediave ndërkombëtare, kjo vë në pikëpyetje nevojën e pretendimeve të fundit të presidentit Donald Trump për marrjen ose blerjen e ishullit arktik.

Marrëveshja, e nënshkruar në vitin 1951 mes SHBA-së dhe Danimarkës, kur këta të fundit ishin pushtuar nga nazistët, i jep Uashingtonit të drejtën të strehojë personel ushtarak, të kontrollojë ulje-ngritjet, ankorimet dhe lëvizjet e mjeteve ajrore dhe detare, si dhe të ndërtojë, mirëmbajë dhe operojë baza ushtarake në Groenlandë.

Dokumenti ka dalë sërish në vëmendje në një moment tensionesh politike, pasi Trump ka deklaruar se Groenlanda është “thelbësore për sigurinë kombëtare të SHBA-së”, teksa e ka cilësuar edhe një burim të ardhshëm pasurish minerare. Ditët e fundit, ai ka lënë të hapur edhe mundësinë e përdorimit të forcës ushtarake, duke shqetësuar aleatët europianë.

Sipas analistit Mikkel Runge Olesen nga Instituti Danez për Studime Ndërkombëtare, SHBA-ja ka “praktikisht dorë të lirë” në Groenlandë. “Është e vështirë të imagjinohet që Shtetet e Bashkuara të mos marrin gjithçka që dëshirojnë, mjafton ta kërkojë,” tha ai për New York Times.

Një amendament i vitit 2004 parashikon që SHBA-ja të konsultohet me Danimarkën dhe Groenlandën për çdo ndryshim të rëndësishëm ushtarak, por ekspertët e konsiderojnë këtë më tepër një formalitet diplomatik. Aktualisht, SHBA-ja mban vetëm një bazë ushtarake, e njohur sot si “Pittufik Space Base”, që shërben për monitorimin e raketave që mund të kalojnë mbi Polin e Veriut.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)